हामी सबैकाे संसारन्यूज

१२ साउन, काठमाण्डौं । कोरोना संक्रमण रोकथामका लागि सडक देखि अस्पतालसम्म खटिएका सुरक्षाकर्मीमा संक्रमण बढ्दै गएको छ । आइतबारसम्म दुई सय ९७ सुरक्षाकर्मीमा संक्रमण देखिएको छ ।

प्रहरी प्रधान कार्यालयमा कार्यरत ५४ प्रहरीमा आइतबार संक्रमण देखिएको छ । सवारी शाखामा कार्यरत १ चालकमा रहेको संक्रमण अरुमा सरेको आशंकामा परीक्षण गर्दा थप ३ प्रहरीमा देखिएको हो । संक्रमित प्रहरी व्यारेकमै बस्दै आएकाले अन्य प्रहरीलाई पनि क्वरोन्टिनमा राखिएको छ । धेरै प्रहरीमा संक्रमण फैलिएको आशंकामा आइतबारदेखि प्रहरी प्रधान कार्यालयमा सर्वसाधारणलाई प्रवेशमा रोक लगाइएको छ । सबैजसो प्रहरीको परीक्षणको तयारी छ ।

केही दिनयता प्रहरीमा संक्रमण बढ्दो छ । प्रदेश १ का मोरङ, झापा र इलाममा संक्रमण देखिएको छ । नेपाल प्रहरीका १ सय १९ कर्मचारीमा हालसम्म संक्रमण देखिएको र त्यसमध्ये ९५ जना निको भइसकेको प्रहरी प्रवक्ता निरज शाहीले बताएको सोमबारको नयाँपत्रिका दैनिकमा समाचार छ ।

त्यस्तै सशस्त्र प्रहरीका ९१ कर्मचारीलाई संक्रमण देखिएको छ । जसमध्ये २१ जना उपचाररत छन् । संक्रमितमध्ये धेरैजसो भारतसँगको सीमा क्षेत्रमा खटिएका प्रहरी छन् । गत साता झापमा मात्र २० जनामा संक्रमण देखिएको थियो ।

त्यस्तै नेपाली सेनाका ८७ जनामा संक्रमण देखिएकोमा ७० जना पूर्ण निको भएर काममा फर्केको प्रवक्ता सन्तोष वल्लभ पौडेलले जानकारी दिएका छन् । उपचाररत १७ जनाको पनि स्वास्थ्य अवस्था सामान्य रहेको बताइएको छ ।

कोरोना रोकथाम तथा उपचारमा खटिएका कर्मचारीलाई सरकारले जोखिम भत्ता दिने निर्णय गरेपनि चार महिनासम्म कसैले पाएका छैनन् । साथै सबै राष्ट्र सेवकको कोरोना बिमा गरिने भनेर सरकारले निर्णय गरेपनि अहिलेसम्म कार्यान्वयन हुन सकेको छैन ।