Sansar News
२० साउन, काठमाडौँ । अख्तियारले एक महिनाको अवधिमा विशेष अदालतमा मुद्धा दता गरेकोमध्ये विशेष गरी प्राविधिक क्षेत्रमा काम गर्ने कर्मचारी बढी भ्रष्ट रहेको पाइएको छ ।
अख्तियारले गत २७ जेठदेखि १४ साउनसम्म प्राविधिक क्षेत्रका ११ कर्मचारीविरुद्ध अकुत सम्पति कमाएको अभियोगमा मुद्धा दायर गरेको छ ।
उनीहरुले कुल २७ करोड १९ लाख ५ हजार ११९ बराबर स्रोत नखुलेको सम्पति जम्मा गरेको पाइएपछि विशेष अदालतमा मुद्धा दर्ता भएको मंगलबारको राजधानी दैनिकमा समाचार छ ।
धेरैले सरकारी पदको दुरुपयोग गरी गैरकानुनी रुपमा सम्पति कमाएको देखिन्छ । प्राविधिक क्षेत्रका कर्मचारीले अवैध कोटेसन तयार पार्ने, आयोजनाको सुरुवातदेखि अन्तिममा विल फरफारक गर्ने समयमा समेत उनीहरुले घुस लिने गरेको देखिन्छ ।
अख्तियारले स्रोत देखाउन पटक-पटक आग्रह गर्दा समेत उनीहरुले स्रोत खुलाउन नसकेको अध्ययनबाट खुलेको छ । विशेष गरी प्राविधिक कर्मचारीले नक्कली कागजात बनाउन आफै लगाउने र सोबापत पैसा माग गरेको पाइएको छ ।
अख्तियारले अकुत सम्पति कमाएको अभियोग लागेका सिनियर डिभिजनल इन्जिनियर तथा प्राविधिक कर्मचारीका आफन्त, नातागोताको समेत सम्पति छानविन गरेको छ ।
यस्तै, साली नाता पर्ने भन्दै कुनै साइनो तथा सम्बन्ध नै नभएका व्यक्तिको नाममा समेत अवैध तरीकाले कमाएको पैसा राखेको पाइएको छ ।
वि.सं.२०७७ साउन २० मंगलवार ०९:३५ मा प्रकाशित
