हामी सबैकाे संसारन्यूज

२५ साउन, रुकुम पश्मि । रुकुम पश्मिको त्रिवेणी गाउँपालिकाका लेखापाल हेमन्त केसीले सरकारी पैसा आफ्नो र आफन्तको खातामा राखेको पाइएको छ ।

जनप्रतिनिधि र स्थानीय बसिन्दाले विरोध गरेपछि व्यक्तिगत खातामा राखेको फिर्ता गरेका छन् ।

तैपनि आर्थिक नियमितता गर्न खोजेको भन्दै जिल्ला प्रशासन कार्यालयले छानविन सुरु गरेको छ । गत आर्थिक ०७६\७७ मा विभिन्न योजनाको भुक्तानी दिन बजेट नपुगेपछि गाउँ कार्यापालिकाको बैठकमा जनप्रतिनिधिले प्रश्न उठाएका थिए । सम्झौता भएर काम सम्पन्न भएका योजनाको भुक्तनीका लागी कसरी बजेट अपुग भयो भन्ने विषयमा खोजविन सुरु गरिएको थियो ।

त्यसपछि लेखापाल केसीले पेस्की रकम भन्दै २४ लाख ९२ हजार तीन सय ७२ रुपैयाँ आफू र आफ्ना नातेदारको खातामा जम्मा गरेको खुलेको आइतबारको नयाँपत्रिका दैनिकमा समाचार छ ।

‘बजेट अपुग भएको भनिएपछि कार्यपालिकाबाट खोजविन सुरु भएको थियो, हिसाबकिताब खोज्ने क्रममा लेखाको स्रेस्ता हेर्दा त व्यक्तिगत खातामा राखेको पाइयो,’ छानविनमा संलग्न एक जनप्रतिनिधिले भने ।

गाउँपालिकाले छानविनका लागी सात सदस्यीय समिति गठन गरेको थियो । लेखापाल केसीले आफ्नी पत्नी विर्मा केसी र भतिजा सुबास केसीको खातामा पैसा राखेको पाइएको हो । उनकी पत्नी विर्मा वडा नं.५ की वडासदस्य हुन भने भतिजा सुबास लेखा सहयोगी हुन् ।
लेखापाल केसीको खातामा आठ लाख, उनकी पत्नीको खातामा आठ लाख ८६ हजार र भतिजाको खातामा सात लाख ९१ हजार राखेको पाइएको हो ।

‘कार्यपालिकाको बैठकमा गाउँपालिकाको रकम कसरी व्यक्तिगत खातामा गयो भनेर केरकार गरेपछि फिर्ता गरेका छन्,’ गाउँपालिका प्रवक्ता कर्णबहादुर खड्काले भने । १६ साउनमा सात लाख ८२ हजार पाँच सय ९५ रुपैयाँ, १९ साउनमा दुई पटक ६ लाख र ८ लाख ५९ हजार सात सय ७७ तथा २१ साउनमा दुई लाख ५० हजार रुपैयाँ गाउँपालिकाको खातामा जम्मा गरेको खड्काले बताए ।