Sansar News
२५ साउन, काठमाडौँ । सत्तारुढ दल नेपाल कम्युनिष्ट पार्टी(नेकपा)का वरिष्ठ नेता तथा पूर्वप्रधानमन्त्री माधवकुमार नेपालले गौतमबुद्धलाई ‘महान भारतीय’ भनिएकोमा गम्भिर आपत्ति जनाएका छन् ।
नेता नेपालले भारतीय विदेशमन्त्री एस. जयशंकरले नेपालको लुम्बिनीमा जन्मिएका गौतम वुद्धलाई ‘महान् भारतीय’ भन्दै गरेको प्रचारलाई तथ्यहीन र आपत्तिजनक भएको बताएका छन् ।
सामाजिक सञ्जालमार्फत नेता नेपालले भारतीय प्रधानमन्त्री नरेन्द्र मोदीले समेत नेपालको संसदमा समेत बुद्ध नेपालमा जन्मिएको अभिव्यक्ति दिएको र सम्पूर्ण तथ्यले गौतमबुद्ध नेपालमा जन्मिएको कुरा पुष्टि हुँदाहुँदै पनि बेलाबेलामा भारतीय जिम्मेवार अधिकारीबाट यस्ता अभिव्यक्ति आउनु थप दुखद् भएको उल्लेख गरेका छन् ।
यस्ता असंवेदनशील र गलत कुराले दुई देशबीचको सम्बन्धमा प्रतिकूल असर पार्दछन् भन्नेको ख्याल गर्न समेत उनले सम्बन्धित पक्षको ध्यानाकर्षण गराएका छन् ।
उनले यसबारेमा नेपाल सरकारलाई औपचारिक रूपमै भारतसँग कुरा गर्न समेत अनुरोध गरेका छन् ।
वि.सं.२०७७ साउन २५ आइतवार १८:०३ मा प्रकाशित
