Sansar News
२५ साउन, काठमाडौं । राष्ट्र बैंकले बैंक तथा वित्तीय संस्थाहरुलाई घरैबाट काम गर्ने व्यवस्था मिलाउन निर्देशन दिएको छ ।
राष्ट्र बैंकले कोरोना संक्रमणको सुरक्षा सम्बन्धी नेपाल सरकारको स्वास्थ्य सुरक्षा मापदण्ड पालना गर्दै सेवा सञ्चालन गर्न मातहतका निकायलाई निर्देशन दिएको हो ।
राष्ट्र बैंकले सूचना जारी गर्दै अत्यावश्यक पर्ने शाखाहरु न्यूनतम कर्मचारीहरु मात्रै राखेर सञ्चालन गर्न निर्देशन दिएको हो ।
सरकारबाट जारी स्वास्थ्य सुरक्षाको मापदण्ड पालना गदै सेवा निरन्तरताको योजना तयारी गरी कर्मचारीलाई आलो पालो उपस्थित भई काम गर्ने व्यवस्था गर्न तथा घरमै बसेर कार्यसम्पादन गर्ने व्यवस्था मिलाउन केन्द्रीय बैंकले जारी गरेको निर्देशनमा भनिएको छ ।
यस्ता संस्थाको प्रदेश तथा शाखा कार्यालयहरुले पनि न्यूनतम कर्मचारीहरुबाट वैकल्पिक रुपमा आलोपालो सेवा सञ्चालन गर्ने व्यवस्था मिलाउन राष्ट्र बैंकले भनेको छ ।
संक्रमण जोखिम बढिरहेकाले विद्युतीय माध्यमबाट हुने कारोवारलाई प्रोत्साहन गर्न पनि बैंक तथा वित्तीय संस्थालाई आग्रह गरिएको छ ।
वि.सं.२०७७ साउन २५ आइतवार १८:५५ मा प्रकाशित
