Sansar News
काठमाडौं । लगानी बोर्डमा सीईओ सुशील भट्टको नियुक्तिविरुद्व रिट दायर भएको छ । भट्टको नियुक्ती कानूनसम्मत नभएको भन्दै सोमबार उच्च अदालत पाटमा रिट दायर भएको हो ।
अधिवक्ता जयबहादुर भुजेलले भट्टको नियुक्ती बदरको माग गर्दै रिट दायर गरेका हुन् । भुजेलले रिटमा बोर्डको सीईओ बन्न भट्टको योग्यता नपुगेको दाबी गरेका छन् । उनले भट्टको कार्यक्षमताको विषयमा पनि प्रश्न उठाएका छन् ।
गत सोमबारको मन्त्रिपरिषद बैठकले भट्टलाई लगानी बोर्डको प्रमुख कार्यकारी अधिकृत (सीईओ)मा नियुक्त गरेको थियो । अर्थमन्त्री डा. युवराज खतिवडा नेतृत्वको छनौट समितिले उनको नाम सिफारिस गरेको थियो ।
भट्टको नियुक्तीप्रति सत्तारुढ नेकपाकै नेताहरु असन्तुष्ट छन् । पार्टीका कार्यकारी अध्यक्ष पुष्पकमल दाहाल ‘प्रचण्ड’ले नियुक्ती लगत्तै प्रधानमन्त्री केपी शर्मा ओलीलाई भेटेर असन्तुष्टीसमेत जनाएका थिए ।
वि.सं.२०७७ साउन २६ सोमवार १४:५० मा प्रकाशित
