Sansar News
२६ साउन, मुगु । कोरोना कहरको बेला हिमाली जिल्ला मुगु पुगेर डाक्टर गोबिन्द केसीले १ सय ७७ जनालाई हण्डी रोग सम्बन्धी निशुल्क स्वास्थ्य परिक्षण गरेका छन् ।
डा. केसी अस्पताल पुगेको पहिलो दिन बिहिबार ४७ जना, शुक्रबार ३७ जना र आइतबार ९३ जना गरि १ सय ७७ जनाको निशुल्क स्वास्थ्य परिक्षण गरेको जिल्ला स्वास्थ्य प्रमुख निर्मल नगरकोटीले बताए ।
डा.केसीले छायाँनाथ रारा नगरपालिका–१० घट्टलेख गाउँकी १० बर्षिय रेश्मा भामको देब्रेहातको सल्यक्रिया र नगरपालिका–७ बालै गाउँका १७ बर्षिय गगन भामको देब्रे खुट्टाको सल्यक्रिया गरि दिएका छन् ।
गरिव परिवारमा जन्मिएका रेश्मा र गगनले डा.केसी बाट निःशुल्क सल्यक्रिया गर्न पाउदा भगवान भेटे जस्तै महसुस गरेको बताएका छन् ।
जुम्ला खलंगाबाट दुईदिन लगातार पैदल हिडेर मुगु पुगेका डा.केसी चारदिन सम्म अस्पतालमै बिरामीको स्वास्थ्य परिक्षण प्रदान गर्दै ब्यस्त रहेको अस्पतालमा कार्यरत चिकित्सक डबल मल्लले जानकारी दिए ।
शनिबार बिदाको दिन भएकोले डा.केसी अस्पतालमा कार्यरत चिकित्सक स्टाफ नर्सलाई हण्डी रोग र त्यसको उपचारको पद्धति बारेमा दिनभर प्रशिक्षण दिएका दिए । डा.केसी बाट सल्लाह सुझाव पाउदा मुगु अस्पतालमा कार्यरत चिकित्सकको टोली खुशी भएका छन् ।
जुम्लाबाट मुगु पुगेका डा.केसी गमगढी स्थित अनुसाटपमा बास बस्ने बिहान ८ नबज्दै अस्पतालमा पुगेर बिरामीको चेकजाँच सुरु गरेका थिए ।
बिहानको खान नै नखाएर एक गिलास दुधको भरमा बिहान ८ बजेदेखि बेलका ५ बजेसम्म बिरामीको स्वास्थ्य परिक्षण गर्दै समय बिताएको स्वास्थ्य सेवा प्रमुख नगरकोटीले बताए ।
मुगु पुगेका डा.केसी वरपर कतै घुमफिर गर्न गएनन् । फुुर्सद निकालेर कसैसित कुराकानी पनि गरेनन् भने संचारकर्मीसंग पनि नजिक नभई बिहानदेखि साँझसम्म बिरामी हेरफेर गर्दै समय बिताए ।
डडेलधुरा, अछाम, बाजुरा, हुदै हुम्ला अदानचुली गाउँपालिका पुगेर त्यहाँ करिव डेढ सयलाई निःशुल्क स्वास्थ्य परिक्षण गरि फर्किएका डा.केसी फेरि कालिकोट डोल्पा जुम्ला हुदै मुगु पुगेका हुन् ।
वि.सं.२०७७ साउन २६ सोमवार १६:१२ मा प्रकाशित
