हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)का पार्टी प्रवक्ता नारायणकाजी श्रेष्ठले पार्टीभित्र खुल्ला छलफल गर्ने शैली नरहेको बताएका छन् । उनले धेरै नेताहरुमा भित्र एउटा कुरा गर्ने र बाहिर अर्के कुरा गर्ने प्रवृत्ति रहेको बताए ।

सामाजिक सञ्जाल फेसबुकमार्फत उनले छलकपट शैलीले विवादको निकास नहुने टिप्पणी गरे । ‘अन्तरसंघर्षलाई सार्थक निष्कर्षमा पुर्याउन बैचारिक, सैध्दान्तिक, राजनीतिक, प्रवृत्तिगत र मुद्दागतरुपमा सिधा, खुला र स्पष्ट छलफल गर्ने कार्यशैली अख्तियार गर्नुपर्छ’, नेता श्रेष्ठले भनेका छन् ‘हाम्रो पार्टीभित्रको अहिलेको एउटा समस्या सिधा र खुला छलफल गर्नुको सट्टा भित्र एउटा कुरा ,बाहिर अर्को कुरा र एक ठाँउमा एउटा कुरा, अर्को ठांउमा अर्को कुरा गर्ने प्रवृत्ति पनि हो, त्यसले समस्या समाधान गर्न सहयोग गर्दैन, बरु जटील बनाउँछ।’

‘हाम्रो पार्टीभित्रको अहिलेको एउटा समस्या सिधा र खुला छलफल गर्नुको सट्टा भित्र एउटा कुरा ,बाहिर अर्को कुरा र एक ठाँउमा एउटा कुरा, अर्को ठांउमा अर्को कुरा गर्ने प्रवृत्ति पनि हो, त्यसले समस्या समाधान गर्न सहयोग गर्दैन, बरु जटील बनाउँछ।

उनले नेताहरु कम्युनिष्ट आन्दोलनको मर्मलाई केन्द्रबिन्दुमा राखेर खुल्ला र स्पष्ट छलफल गर्न पनि आग्रह गरेका छन् । पार्टी एकताको रक्षा गर्न पनि सिधा, खुला र स्पष्ट छलफल हुनुपर्ने उनको भनाई छ ।

सत्तारुढ नेकपाभित्र विवाद बढ्दै जाँदा नेताहरुबीच सामान्य संवादसमेत हुन सकेको छैन् । पार्टी बैठकमा उपस्थित नहुने तर बाहिरबाट एकले अर्कोलाई आरोप लगाउने गर्ने शैली विकास भएको छ । पार्टी प्रवक्ता श्रेष्ठले पछिल्लो समय गिजोलिएको पार्टी विवादलाई केन्द्रमा राखी स्पष्ट छलफलको आह्वान गरेका हुन् ।

यस्ताे छ श्रेष्ठले सामाजिक सञ्जालमा लेखेकाे भनाइ

कम्युनिष्ट पार्टीको उदेश्य समाजमा आज सम्मको सर्वोत्तम लोकतन्त्रको अभ्यास गर्नु,गराउनु हो ।त्यसका लागि पार्टी भित्र आन्तरिक लोकतन्त्र सुनिश्चित हुनु पहिलो शर्त हो।अत: क पा भित्र अन्तरपार्टीजनवाद,छलफल ,बहस र अन्तरसंघर्स लाई पार्टीको जीवन र चालक शक्ति भनिन्छ। अन्तरसंघर्षलाई स्वस्थ र रुपान्तरणमुखी ढँगले सञ्चालन गर्नाले बिचारको परिमार्जन एवं बिकास ,संगठनको ब्यबस्थापन ,परिचालन एवं ‬‪सुदृढीकरण र सामाजिक रुपान्तरणको क्रान्तिकारी उदेश्यमा योगदान पुर्याउँछ ।

अन्तरसंघर्षलाई सार्थक निष्कर्षमा पुर्याउन बैचारिक ,सैध्दान्तिक ,राजनीतिक ,प्रवृत्तिगत र मुद्दागतरुपमा सिधा,खुला र स्पष्ट छलफल गर्ने कार्यशैली अख्तियार गर्नुपर्छ ।हाम्रो पार्टीभित्रको अहिलेको एउटा समस्या सिधा र खुला छलफल गर्नुको सट्टा भित्र एउटा कुरा ,बाहिर अर्को कुरा र एक ठाँउमा एउटा कुरा,अर्को ठांउमा अर्को कुरा गर्ने प्रवृत्ति पनि हो । त्यसले समस्या समाधान गर्न सहयोग गर्दैन ,बरु जटील बनाउछ।त्यसैले पार्टी, बर्ग,आन्दोलन, देश र जनतालाई केन्द्रबिन्दुमा राखी सिधा,खुला र स्प्ष्टरुपमा छलफल गरौं र सकारात्मक निकास निकालौं।पार्टी एकताको रक्षा गरौं,समाजवादउन्मुख सामाजिक-आर्थिक रुपान्तरण गर्दै समाजवादको बाटोमा अघि बढौं ।‬