हामी सबैकाे संसारन्यूज

४ भाद्र, काठमाडौँ । रिलायन्स लाइफ इन्स्योरेन्स लिमिटेडले ६३ करोडको आईपीओ आजबाट खुल्ला गरेको छ । कम्पनीले प्रतिकित्ता १०० रुपैयाँ अंकित मूल्यमा ६३ करोड रुपैयाँबराबरको ६३ लाख कित्ता आईपीओ बिक्री खुला गरेको हो ।

त्यसमध्ये ५ प्रतिशत अर्थात् ३ लाख १५ हजार कित्ता सामूहिक लगानी कोषका लागि तथा यस्तै अर्काे ५ प्रतिशत अर्थात ३ लाख १५ हजार कित्ता कर्मचारीका लागि सुरक्षित गरी कम्पनीले बाँकी रहेको ५६ लाख ७० हजार कित्तामा सर्वसाधारणका लागि बिक्री खुला गरेको हो ।

सर्वसाधारणले आईपीओमा आज अर्थात् भाद्र ४ गते देखि भदौ ८ गतेसम्म आवेदन दिन सक्नेछन् उक्त समयमा पर्याप्त आवेदन नपरे ढिलोमा भदौ २२ गतेसम्म आवेदन दिन सक्नेछन् ।

लगानीकर्ताले न्यूनतम १० देखि अधिकतम ६३ हजार कित्तासम्मका लागि आवेदन दिन सक्ने कम्पनीले जनाएको छ । कम्पनीले कुल चुक्ता पुँजीको ३० प्रतिशत आईपीओ जारी गर्न लागेको हो ।

कम्पनीको आईपीओ निष्कासनका लागि धितोपत्र निष्कासन तथा बिक्री प्रबन्धकमा सानिमा क्यापिटल रहेको छ । लगानीर्ताहरूले नेपाल धितोपत्र बोर्डबाट सि–आस्बा अनुमति पाएका बैंक तथा वित्तीय संस्था तथा तिनका शाखा कार्यालयको साथै मेरो सेयर सफ्टवेयरबाट पनि आवेदन दिन सक्नेछन् ।

कम्पनीले आईपीओ निष्कासनका लागि गराएको रेटिङमा इक्रा नेपालले ग्रेड ४ रेटिङ प्रदान गरेको छ । हाल एक अर्ब ४७ करोड चुक्ता पुँजी रहेको कम्पनीको आईपीओ निष्कासनपछि चुक्ता पुँजी दुई अर्ब १० करोड पुग्नेछ ।