हामी सबैकाे संसारन्यूज

७ भदौ, काठमाडौं । गैरआवासीय नेपाली संघ अन्तराष्ट्रिय परिषद (एनआरएनए आइसीसी) को ७४ औं बैठक संघको सदस्यता, महाधिवेशन प्रतिनिधि र अनलाइन भोटिङको ब्यबस्थाको लागि सैद्दान्तिक रुपमा सहमत भएको छ ।

संघका प्रवक्ता डिबी क्षेत्रीका अनुसार, बैठकमा संघको साधारण सभा, सदस्यता र प्रतिनिधि छनोटका बिषयमा धेरै छलफल भएका छन् । यस बाहेक केहि नियमित एजेण्डामा पनि छलफल र निर्णय भएका छन् । तर बिशेष रुपमा भने सदस्यता, महाधिवेशन प्रतिनिधि र निर्वाचन प्रणालीमा नै केन्द्रित रहन गएको बताइएको छ ।

अगष्ट २२ मा बसेको एनआरएनए आइसीसीको ७४ औं बैठकले संघको सदस्यता र महाधिवेशनका प्रतिनिधि, निर्वाचन प्रणाली सम्बन्धि निर्णय गरेको छ ।
अब संघको सदस्यता स्मार्ट एनआरएनए सिष्टममा गएर निःशुल्क लिन सक्ने बनाइने छ । त्यसैगरी महाशिवेशन प्रतिनिधि पनि निशुल्क गर्ने र अनलाइन भोटिङको ब्यबस्थालाइ उत्कृष्ट रुपमा नीति तय गर्नको लागि समेत निर्णय गरिएको छ ।

यसका लागि बैठकले संघका महासचिव डा हेम राज शर्माको संयोजकत्वमा एक कार्यदल गठन गरेको छ ।
कार्यदलमा सचिव गौरीराज जोशी, कोषाध्यक्ष महेश श्रेष्ठ र निवर्तमान प्रवक्ता तथा बिधान समितिका संयोजक भुषण घिमिरे रहेका छन् । आवश्यक्ता अनुसार कार्यदलले सदस्यहरु थप गर्न सक्ने बताइएको छ ।

तर कार्यदलले नीतिको ब्यबहारिकतालाइ समेत ध्यान दिएर प्रतिवेदन तयार पारी दुइ हप्ताभित्रमा संघको पदाधिकारी बैठकमा पेश गर्नुपर्ने छ । संघले सो नीति गैरआवासीय नेपाली संघको बिशेष साधारणसभामा पेश गर्ने छ ।