Sansar News
काठमाडौं । भारतमा कांग्रेस केन्द्रीय समिति बैठक अघि पूर्वमुख्यमन्त्रीसहित कांग्रेसका २३ वरिष्ठ नेताहरुले पार्टी अध्यक्ष सोनिया गान्धीलाई पत्र लेखेका छन् । नेतृत्वको विषयमा कांग्रेसभित्र बहस चलिरहेका बेला उनीहरुले सामुहिक रुपमा पत्र लेखेका हुन् ।
कांग्रेस कार्यसमिति (सीडब्ल्यूसी)को बैठक भिडियो कन्फ्रेन्समार्फत सोमबार (भोली) बस्दैछ । बैठकले राजनीतिक विषयसँगैै पार्टी नेतृत्वको विषयमा पनि महत्वपुर्णं फैसला लिने अनुमान गरिएको छ । चिठ्ठी लेख्नेमध्येमा ५ पुर्वमुख्यमन्त्री, केन्द्रीय कार्यसमिति सदस्य, सांसद र पूर्व केन्द्रीय मन्त्रीहरु पनि छन् ।
के छ गान्धीलाई लेखिएको चिठ्ठीमा ?
इण्डियन एक्सप्रेसका अनुसार गान्धीलाई लेखिएको चिठ्ठीमा नेताहरुले कांग्रेसभित्र माथिदेखि तलसम्मै आत्मविश्वास कमजोर भएको बताएका छन् । उनीहरुले भाजपा अगाडि बढिरहेको र कांग्रेस अत्यन्तै कमजोर बन्दै गएको कुरा उल्लेख गरेका छन् ।
जनाइएअनुसार पत्रमार्फत नेताहरुले समग्र संरचनामा परिवर्तन हुनुपर्ने माग राखेका छन् । उनीहरुले पार्टी नेतृत्व पनि परिवर्तन हुनुपर्ने एजेण्डा अगाडि सारेका छन् । जनाइएअनुसार गान्धीलाई नेताहरुले १५ दिन अगाडि नै पत्र लेखेका थिए ।
प्रतिवेदनका अनुसार यस पत्रमा राज्य सभामा विपक्षका नेता गुलाम नबी आजाद, पार्टीका सांसद तथा पूर्व केन्द्रीय मन्त्री आनन्द शर्मा, कपिल सिब्बल, मनीष तिवारी, शशि थरुर र विकेक तनखाको हस्ताक्षर छ । कांग्रेसको कार्यकारी अध्यक्षको रुपमा सोनिया गान्धीको कार्यकाल एक वर्ष पूरा भएपछि पार्टीमा पूर्णकालिक अध्यक्षको माग बढिरहेको छ ।
वि.सं.२०७७ भदौ ७ आइतवार १८:१६ मा प्रकाशित
