हामी सबैकाे संसारन्यूज

काठमाडौं । विभिन्न मुद्दामा द्वन्द चलिरहेको बेला अमेरिका र चीनबीच शीर्ष तहमा वार्ता भएको छ । अन्तराष्ट्रिय सञ्चार माध्यमले जनाएअनुसार फोनमार्फत दुई देशका उच्च अधिकारीबीच वार्ता भएको हो । जनाइएअनुसार वार्ता सकारात्मक रहेको र व्यापार सम्झौतालाई अगाडि बढाउने सहमती भएको छ ।

गत जनवरीमा भएको वार्तापश्चात अमेरिका र चीनले एक सम्झौतामा हस्ताक्षर गरेका थिए । सोही सम्झौतालाई आधार मान्दै सोमबार अमेरिकाका व्यापार प्रतिनिधि रोबर्ट लाइटहाइजर र चीनका उपप्रमुख लियू हूसे टेलिफोन वार्ता गरेका थिए । वार्तामा आर्थिक व्यापारिक सम्झौतालाई कार्यान्वयन गर्ने कुरामा छलफल भएको थियो ।

जनाइएअनुसार वार्तामा दुई देशबीचको व्यापारमा तत्कालै कुनै पनि अतिरिक्त शुल्क नलिइने सम्झौता भएको छ । दुई देशबीच आगामी ६ महिनाभित्र अर्को वार्ता गरि सम्झौतालाई पुनः सरलीकृत गरिने पनि सम्झौता भएको छ ।

जनाइएअनुसार वार्ताबाट अमेरिका र चीनले आ–आफ्नो तर्फबाट लगाइएका कतिपय प्रतिबन्धको सम्बन्धमा भने ठोस निष्कर्ष निस्किएको छैन् । कोरोना महामारीको बीच अमेरिकाले चिनियाँ कम्पनीहरुमाथि लगाएको प्रतिबन्धबारे भने अर्को चरणमा छलफल गर्न प्रस्ताव गरेको छ । एजेन्सीको सहयोगमा