हामी सबैकाे संसारन्यूज

काठमाडौं । शनिबारका लागि तय भएको नेपाल कम्युनिष्ट पार्टी (नेकपा)को सचिवालय बैठक अन्तिम समय स्थगित भएको छ । पार्टी अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच शुक्रबार भएको छलफलसँगै बैठक स्थगित भएको हो ।

बैठक आगामी भदौ १८ मा बस्ने गरि सारिएको बालुवाटार स्रोतले जानकारी दिएको छ । बैठक कोरोनाको कारण सारिएको नेकपाले जनाएको छ ।

जनाइएअनुसार सचिवालय सदस्यसमेत रहेका उपप्रधान तथा रक्षामन्त्री ईश्वर पोखरेल र गृहमन्त्री रामबहादुर थापा ‘बादल’ आइसोलेसनमा बस्नुपर्ने भएकाले बैठक स्थगित गरिएको हो । जनाइएअनुसार सीसीएमसीका कार्यालय सहयोगीमा कोरोना संक्रमण देखिएसँगै दुवै नेता होम आइसोलेसनमा छन् ।

शनिबार बस्ने सचिवालय बैठकमा पार्टी विवाद समाधानका लागि नेकपा कार्यदलले बुझाएको प्रतिवेदनबारे छलफल गर्ने कार्यक्रम थियो । गत शनिबार कार्यदलले पार्टी विवाद समाधान गर्न सुझावसहितको प्रतिवेदन दुई अध्यक्षलाई बुझाएको थियो ।

पार्टीभित्र विवाद चरमता तिर पुगेसँगै गत साउन ३० मा कार्यदल गठन गरि विवाद समाधानको उपाय खोजिएको थियो ।