हामी सबैकाे संसारन्यूज

१४ भदौ, काठमाडौं । गण्डकी प्रदेशमा एक स्वास्थ्यकर्मीसहित थप पाँचजनामा कोरोना संक्रमण पुष्टि भएको छ ।

प्रदेशको स्वास्थ्य निर्देशनालयका अनुसार राष्ट्रिय जनस्वास्थ्य प्रयोगशाला काठमाडौंमा गरिएको परीक्षणमा नवलपरासीपूर्वको मध्यविन्दु नगरपालिका वडा नं ४ की २० वर्षीया महिला स्वास्थ्यकर्मी सहित पाँच संक्रमित थपिएका हुन् ।

पोखरा स्वास्थ्य विज्ञान प्रतिष्ठान पोखरामा गरिएको परीक्षणमा पोखरा महानगरपालिका वडा नं ७ की ३७ वर्षीया महिला र ५३ वर्षीय पुरुष, ८ का ३८ वर्षीय पुरुष र भरतपुर अस्पताल चितवनमा गरिएको परीक्षणमा कावासोती २ की २९ वर्षीया महिलामा संक्रमण पुष्टि भएको हो ।
आज थपिएका ५ सँगै प्रदेशमा कोरोना संक्रमितको संख्या २०९९ पुगेको छ ।

मृतकको संख्या १३ पुग्यो
त्यसैगरी शनिबार बिनय त्रिवेणी गाउँपालिका ६ का ६२ वर्षीय पुरुषको चितवन मेडिकल कलेजमा मृत्यु भएसँगै गण्डकी प्रदेशमा संक्रमणबाट मृत्यु हुनेको संख्या १३ पुगेको पनि निर्देशनालयद्धारा जारी विज्ञप्तिमा जनाइएको छ ।