हामी सबैकाे संसारन्यूज

काठमाडौं । परराष्ट्र मन्त्री प्रदीप ज्ञवालीले रेसुङ्गा नगरपालिकालाई हस्तान्तरण गरेको पीसीआर मेसिन नक्कली परेपछि फिर्ता भएको छ । हेलिकोप्टरको प्रयोग गरि तामझामसहित गुल्मी पुर्याइएको मेसिन प्रयोग नै गर्न नमिल्ने प्रमाणीत भएपछि फिर्ता भएको हो ।

गत साउन ३ मा भव्य कार्यक्रम गरेर मन्त्री ज्ञवालीले रेसुङ्गा नगरपालिकालाई मेसिन हस्तान्तरण गरेका थिए । तर हस्तान्तरण गरिएको मेसिन कामै नलाग्ने प्रमाणीत भएपछि नगरपालिकाले फिर्ता गरेर पठाएको जनाएको छ । नगरपालिकाका मेयर डिल्लीराज भुसालका अनुसार विज्ञ प्राविधिकलाई मेसिन देखाउँदा प्रयोग गर्न नमिल्ने जानकारी भएपछि फिर्ता गरिएको हो ।

मन्त्री ज्ञवालीले हस्तान्तरण गरेको मेसिन सञ्चालनमा ल्याउन नसकेपछि नगरपालिकाले जनस्वास्थ्य प्रयोगशाला भैरहवा र पछि मन्त्री ज्ञवालीकै सहयोगमा काठमाडौंबाट समेत स्वास्थ्य प्राविधिक झिकाएको थियो । तर मेसिनमा आवश्यक पाटपुर्जा नै नभएको र मर्मतसमेत गर्न नमिल्ने प्रमाणीत भएपछि फिर्ता भएको हो ।

मेसिन गुल्मीका दुई नगरपालिका र दश गाउँपालिकाको पीसीआर परीक्षणको लागि मगाइएको थियो । मेसिन सञ्चालनको जिम्मा रेसुङ्गा नगरपालिकाले लिएको थियो ।

मेसिन यति समुहले व्यापारको लागि नियोजित दिएकाे

रेसुङ्गा नगरपालिकाका मेयर डिल्लीराज भुसालले जनाएअनुसार मेसिन यसअघि चर्चा भए बमोजिम पैसा भुक्तान गरेर ल्याइएको होइन । मेसिन यति समुहले मन्त्री ज्ञवालीमार्फत सौजन्य दिएको हो ।

जानकारीअनुसार मेसिन यति समुहभित्रका हिमालय एयरलाईन्स सञ्चालन समुहका उपाध्यक्ष विजय श्रेष्ठले उपलब्ध गराएका थिए । श्रेष्ठले मन्त्री ज्ञवालीमार्फत दिएको मेसिन चीनबाट ल्याइएको थियो ।

रेसुङ्गाका मेयर भुसालका दिइएको मेसिनमा आवश्यक कुनै पनि पार्टपुर्जा नै थिएन । मेसिन हेर्न आएका प्राविधिकले पनि मेसिन ‘नमुना’ मात्रै भएको जानकारी दिएका थिए ।

प्राविधिकले मेसिनलाई प्रयोगमा ल्याउन भएका पार्टपुर्जाको मर्मत गर्नुपर्ने र अन्य दर्जनौं पार्टपुर्जा किन्नुपर्ने सुझाव दिएका थिए । सौजन्य प्राप्त मेसिनलाई पुनः लाखौं तिरेर मर्मत गर्नुपर्ने र थप महंगो सामान किन्नुपर्ने भए पछि नगरपालिकाले फिर्ता गरेको हो ।

मेयर भुसालले जनाएअनुसार प्राविधिकले विभिन्न २२ वटा पार्टपुर्जा किन्न सुझाव दिएका थिए । उनका अनुसार सोही कम्पनी बाहेक अन्य कम्पनीको पार्टपुर्जा काम नलाग्ने मेसिनमा प्रत्येक पार्टपुर्जाको मुल्य १ लाखभन्दा माथि छ । कतिपय पार्टपुर्जाको मुल्य १० लाखसम्म पर्ने छन् ।

अर्को मेसिन दिने आश्वासन

‘नमुना मेसिन’ दिएर आलोचित भएका मन्त्री ज्ञवालीले अर्को पीसीआर मेसिन दिलाईदिने आश्वासन दिएका छन् । मेसिन फिर्ता भएसँगै चर्को आलोचना खेपिरहेका उनले एक/दुई साताभित्र अर्को मेसिन दिलाईदिने आश्वासन दिएको मेयर भुसालले जानकारी दिए ।

नमुना पीसीआर मेसिन हस्तान्तरण गर्न निकै ठुलो खर्च र तामझामसहित मन्त्री ज्ञवाली हेलिकप्टर नै लिएर गुल्मी गएका थिए । तर, मेसिन ‘नमुना’खालको परेसँगै निकै आलोचना भएको छ ।