हामी सबैकाे संसारन्यूज

काठमाडौं । काठमाडौंमा बोइलर कुखुराको मासु गुन्द्रुकभन्दा सस्तो भएको छ । लकडाउनका कारण निरन्तर मुल्य घट्दा कुखुराको मासु अति सस्तो भएको हो । नेपाल राष्ट्रिय कुखुरा व्यवसायी संघका अनुसार हाल कुखुराको मासुको बजार मुल्य पछिल्लो समयकै सबैभन्दा बढि सस्तिएको छ ।

नेपाल राष्ट्रिय कुखुरा व्यवसायी संघका अनुसार शुक्रबारदेखि काठमाडौंमा बोइलर कुखुराको मुल्य प्रतिकेजी २४० रुपैयाँ कायम छ । जबकी कालीमाटी फलफूल तथा तरकारी बजार विकास समितिले गुन्द्रुकको मुल्य न्यूनतम २९० रुपैयाँ र अधिकतम ३०० रुपैयाँ तोकेको छ ।

यसअघि लकडाउनको सुरुवात हुँदै गर्दा कुखुराको मासुको मुल्य १८० रुपैयाँसम्म झरेको थियो । तर, लकडाउन बढ्दै जाँदा मासुको मुल्य ह्वात्तै बढेर झण्डै ४ सय रुपैयाँसम्म पुगेको थियो ।

काठमाडौं उपत्यकासहित केहि जिल्लाहरुमा पुनः निषेधाज्ञा जारी भएसँगै मासुको मुल्य घटेको हो । निषेधाज्ञामा तरकारी तथा फलफूलको मुल्य भने आकासिएको छ । काठमाडौं उपत्यकामा हरियो तरकारीको मुल्य पछिल्लो समयकै सबैभन्दा महंगो हुन गएको छ ।