हामी सबैकाे संसारन्यूज

१७ भदौ, काठमाडौं । कोरोना संक्रमणबाट भक्तपुरको मध्यपुर थिमी नगरपालिकाका वडा नं ७ का एक युवाको मृत्यु भएको छ ।

कोरोना संक्रमणबाटै ६४ वर्षीया आमाको मृत्यु भएको ४ दिनमै पाटन अस्पतालको भेन्टिलेटरमा उपचाररत ४० वर्षीय छोराको पनि मृत्यु भएको नगरपालिकाकी उपमेयर अन्जना देवी मधिकर्मीले संसारन्युजलाइ जानकारी दिएकी छन् ।

१५ दिनदेखि पाटन अस्पतालको भेन्टिलेटरमा राखेर उपचार गरिएका ती युवकको मंगलबार राति मृत्यु भएको हो ।

‘आमाको मृत्यु भएको ४ दिन मात्रै पुगेको छ । छोराको पनि आज मृत्यु भयो । परिवारका ६ जना सदस्यमा कोरोना संक्रमण देखिएकोमा २ जनाको मृत्यु भयो । युवकका वुवा, गर्भवती श्रीमती र छोराछोरीमा पनि संक्रमण देखिएको छ ।’ उपमेयर मधिकर्मीले भनिन्, ‘ कमाएर परिवार पाल्ने उनीहरु दुवै जनाको मृत्यु भएपछि परिवारको विचल्ली भएको छ ।’

मध्यपुर थिमी नगरपालिकामा हालसम्म २४९ जनामा कोरोना संक्रमण पुष्टि भएको छ भने आज मृत्यु भएका युवकसहित तीनजनाको मृत्यु भएको छ । यसअघि नगरपालिकाको वडा नं ३ की एक महिलाको पनि संक्रमणबाट मृत्यु भएको थियो । नगरपालिकामा हालसम्म झण्डै ८ सय पिसीआर परीक्षण गरिएकोमा २४९ जनामा कोरोना पोजेटिभ देखिएको हो ।

नगरपालिकामा कोरोना संक्रमण बढ्दै गइरहेको अवस्थामा नागरिकमा भने सचेतना नदेखिएकोमा उपमेयर मधिकर्मी दुःख व्यक्त गर्छिन् । ‘बिहान र बेलुका २÷२ घण्टा माइकिङ गरेर सचेतना जगाइरहेका छौं । तर, भित्र भित्र गल्लीमा मास्क नलगाउने, भएको मास्क पनि खल्तीमा राखेर बस्ने र लापरवाही गर्नुभएको पाएका छौं, नगरवासीलाई संक्रमणबाट जोगिनका लागि सचेत रहन पुनः अनुरोध गर्दछौं ।’ मेयर मधिकर्मीले भनिन् ।