हामी सबैकाे संसारन्यूज

३० भदौ, काठमाडौँ । केही महिनाअघि मात्र अब विभाजन नहुने भन्दै गीता छोएर कसम खाएर एक भएको राष्ट्रिय प्रजातन्त्र पार्टी(राप्रपा)मा फेरि खैलाबेला सुरु भएको छ ।

डा.प्रकाशचन्द्र लोहनीले एक टिभी अन्तर्वार्ताको माध्यमबाट पार्टी एकतावारे एकपक्षीय रूपमा जुन भ्रम सिर्जना गर्ने प्रयास गर्नु भएको छ,त्यो पार्टी एकताको भावना विपरित छ‌।एकता खल्बल्याउने मनसायबाट अभिप्रेरित देखिन्छ।

— Kamal Thapa (@KTnepal) September 15, 2020

राप्रपा अध्यक्ष डा प्रकाशचन्द्र लोहनीले एक टिभी अन्तर्वार्ताका क्रममा पार्टी एकताबारे दिएको अभिव्यक्तिलाई लिएर अर्का अध्यक्ष कमल थापाले आपत्ति जनाएका छन् ।

अध्यक्ष डा लोहनीले पार्टी एकताबारे एकपक्षीय रुपमा दिएको अभिव्यक्तिले भ्रम सिर्जना गर्ने प्रयास भएको र त्यो पार्टी एकताको भावना विपरित भएको भन्दै अध्यक्ष थापाले टिव्टरमा लेखेका छन् ।

उनले अध्यक्ष डा लोहनीको अभिव्यक्ति एकता खल्बल्याउने मनसायबाट अभिप्रेरित भएको बताएका छन् ।

लोहनीले अन्तर्वार्ताका क्रममा पार्टी एकता प्रक्रिया र निर्वाचन आयोगमा दर्ता गर्ने विषयमा बोलेका कुरालाई लिएर अध्यक्ष थापाले आपत्ति जनाएको बुझिन्छ ।

स्मरण रहोस् राष्ट्रिय प्रजातन्त्र पार्टी र राप्रपा संयुक्त बीच गत फागुन २४ गते एकीकरण सभा गरेर पार्टी एक भएको घोषणा गरिएको थियो । ३ अध्यक्ष रहने गरी घोषणा गरीएको राष्ट्रिय प्रजातन्त्र पार्टीमा कमल थापा, डा.प्रकाशचन्द्र लोहनी र पशुपति शमशेर अध्यक्ष रहेका छन् । हिन्दु राष्ट्र बनाउने नीतिअनुसार दुई राप्रपा मिलेका हुन्। राप्रपा निर्वाचन आयोगमा दल दर्ताका क्रममा रहेको छ ।