Sansar News
काठमाडौं । नेपाल कम्युनिष्ट पार्टी (नेकपा)का उपाध्यक्ष वामदेव गौतमलाई राष्ट्रियसभामा मनोनीत गर्ने राष्ट्रपतिको निर्णय बदर गर्न माग गर्दै सर्वोच्च अदालतमा रिट दायर भएको छ । सोमबार अधिवक्ता दिनेश त्रिपाठीले गौतमको मनोनय बदरको माग गर्दै दायर गरेको रिट दर्ता भएको हो ।
अधिवक्ता त्रिपाठीले गौतमको नियुक्ती संविधान विपरित रहेको भन्दै बदरको मागसहित रिट दर्ता गराएका हुन् । अधिवक्ता त्रिपाठीले जनाएअनुसार दर्ता रिटमाथि आगामी बुधबार सुनुवाई हुनेछ ।
गत बिहीबार सरकारको सिफारिसमा राष्ट्रपति विद्यादेवी भण्डारीले गौतमलाई राष्ट्रिय सभा सदस्यका रुपमा मनोनित गरेकी थिइन् । गौतमले राष्ट्रिय सभा सदस्यका रुपमा सपथसमेत लिइसकेका छन् ।
पछिल्लो प्रतिनिधि सभा निर्वाचनमा गौतम बर्दिया निर्वाचन क्षेत्र नं. १ बा पराजित भएका थिए । उनलाई कांग्रेस नेता सञ्जय गौतमले ७ सय ७५ मत अन्तरले पराजित गराएका थिए ।
राष्ट्रिय सभा सदस्यमा मनोनित गौतम मन्त्री बन्ने चर्चा छ । जसबारे नेकपाभित्र पनि छलफल चलिरहेको छ ।
वि.सं.२०७७ असोज ५ सोमवार १६:०९ मा प्रकाशित
