हामी सबैकाे संसारन्यूज

काठमाडौं । सत्तारुढ नेपाल कम्युनिस्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीचको सोमबारको छलफल पनि विनानिष्कर्ष सकिएको छ । झण्डै ३ घण्टासम्म चलेको छलफल निष्कर्ष बिहिन बनेको नेकपा स्रोतले जनाएको छ ।

मन्त्रिमण्डल पुनर्गठनका लागि दुई अध्यक्षबीच केहि दिनदेखि निरन्तर छलफल छ । स्रोतले उल्लेख गरेअनुसार सोमबारको छलफलमा मन्त्रालय बाँडफाँडबारे छलफल भएको थियो । जसमा दुई अध्यक्ष निष्कर्षमा पुगेका छैनन् ।

जनाइएअनुसार आजको बैठकमा अध्यक्ष प्रचण्डले पार्टी एकताअनुसारको समझदारीअनुसार बाँडफाँडको प्रस्ताव राखेका थिए । जसबारे ओलीले सहमती जनाएका छैनन् ।

गत बिहिबारदेखि दुई अध्यक्षबीच मन्त्रिमण्डल पुनर्गठनको बारेमा नै छलफल चलिरहेको छ ।

यसअघि आइतबार मन्त्रिमण्डल पुनर्गठनका विषयमा छलफल चलेको भए पनि सहमती हुन सकेको थिएन । बताइएअनुसार क–कसलाई हटाउने र क–कसलाई राख्ने भन्नेमा नै सहमती भएको छैन् । साथै कुन पक्षले कति र कुन मन्त्रालय पाउने भन्ने विषय टुंगीएको छैन् ।