हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)को सचिवालय बैठक भोली (शनिबार) बस्ने भएको छ । पार्टी अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच शुक्रबार भएको छलफलमा शनिबार बैठक बोलाउने सहमती भएको प्रचण्डका प्रेस सल्लाहकार विष्णु सापकोटा जुगलले जानकारी दिए ।

उनका अनुसार सचिवालय बैठक दिउसो ४ बजेलाई बोलाइएको छ ।

पछिल्ला राजदूत नियुक्तीहरुप्रति पार्टीका कार्यकारी अध्यक्ष प्रचण्डले असन्तुष्टी व्यक्त गरेका थिए । प्रचण्डका प्रेस सल्लाहकार जुगलका अनुसार पछिल्ला विवादहरु बारे समाधान खोज्न सचिवालय बैठक बोलाइएको हो ।

‘यी सबै विषयमा शनिबार सचिवालय बैठक बोलाइएको छ, त्यहिँ नै छलफल गर्ने भन्ने छ, बाँकी कुरा त्यहिँबाट मिल्ला’, सापकोटाले भने ।
दुई अध्यक्षबीच शुक्रबार बिहान प्रधानमन्त्री निवास बालुवाटारमा झण्डै १ घण्टाजति छलफल भएको थियो ।

बिहिबार मन्त्रिपरिषद बैठकले अमेरिका लागि पूर्वअर्थमन्त्री डा. युवराज खतिवडा र बेलायतका लागि लोकदर्शन रेग्मीलाई राजदूतमा नियुक्ती गर्न सिफारिस गरेको थियो । साथै बैठकले मुख्यसचिवमा परराष्ट्रका सचिव शंकरदास वैरागीलाई नियुक्ती गरेको थियो ।