हामी सबैकाे संसारन्यूज

२२ असोज, काठमाडौं। लालबन्दी स्थीत नेपाल विद्युत् प्राधिकरण वितरण केन्द्रले उपभोक्ताको मिटर रिडिङ नगरिकनै जरिवाना असुली गरेको छ । कोभिड–१९ का कारण गरिएको लकडाउनमा मिटर रिडिङ नगरेको वितरण केन्द्रले उपभोक्ता बाट उक्त समयको महशसुलमा थप १० प्रतिशत जरिवाना लगाएको उपभोक्ताले गुनासो गरेका छन् ।

लालबन्दी वितरण केन्द्रले लकडाउनको अवस्था अलि सहज भएपछि बिल तिर्न आउन सूचना जारी गरेपनि वितरण केन्द्रका कर्मचारीको मनलाग्दी खपत शुल्कमा जरिवानासमेत लिने गरेको लालबन्दीका उपभोक्ता श्याम लामाले बताउनुभयो । प्राधिकरणका कर्मचारीले समयमा मिटर रिडिङ नगरेको र आफूले पैसा तिर्दा मिटरमा उठेको रकमको जरिवानासमेत गरी तिर्नुपरेको उनीहरूको गुनासो छ ।

लकडाउनको शुरुवाति चरणमा समस्या आएको तर अहिले त्यो समस्या समाधान भइसकेको साथै सबै विकल्प दिइएको भए पनि उपभोक्ताले बेवास्था गरेका र सबैलाई जानकारी नभएका कारण पनि समस्या आएको विद्युत् प्राधिकरण वितरण केन्द्र लालबन्दीका प्रमुख सुधीरकुमार रायले बताए।

पहिलाको निर्णयअनुसार असोज ६ गतेपछि जरिवाना लिने भनिएको र सोहीअनुसार जरिवाना लिएको तर फेरि विद्युत् प्राधिकरणले असोज २२ गतेसम्म जरिवाना नलिने निर्णय गरेपछि बीचमा लिएको जरिवाना खपत युनिटबाट घटाउने विद्युत् प्राधिकरणले निर्णय गरेको वितरण केन्द्रका प्रमुख रायले बताए।रासस