Sansar News
काठमाडौं । पुनर्निमाण भईरहेको धरहराको १६ औं तलाको ढलानको काम सम्पन्न भएको छ । पुनर्निमाण प्राधिकरणले जनाएअनुसार अब ६ वटा तलाको मात्रै ढलान गर्न बाँकी छ ।
प्राधिकरणका अनुसार ६ तलाको ढलान र टावरको प्लाष्टर, धरहरा परिसर घेर्ने पर्खाल र पार्किङ क्षेत्रको काम पनि अहिले सँगसँगै चलिरहेको छ । कुनै समस्या नआए आगामी ३ महिनाभित्र ढलानका सबै काम सकिसक्ने प्राधिकरणको लक्ष्य छ ।
धरहराको पुननिर्माण २०७५ असोज २० देखि भएको थियो । यसको पुननिर्माणको जिम्मा रमन कन्सट्रक्सनले अनुमानित लागत ३ अर्ब ४८ करोड रुपैयाँमा लिएको छ ।
भीमसेन थापाले वि.सं. १८८२ मा निर्माण गरेको ११ तले धरहरा वि.सं. १९९० मा आएको भूकम्पमा क्षतिग्रस्त बन्न पुगेको थियो । त्यससमय धरहरा ११ तलाबाट ९ तलामा सीमित भएको थियो ।
त्यसपश्चात २०७२ वैशाख १२ मा आएको विनाशकारी भूकम्पले धरहरा पूर्णं क्षतिग्रस्त बन्न पुग्यो । पूर्णं क्षति भएपश्चात सरकारले पुर्ननिर्माणको काम अगाडि बढाएको हो ।
यसपटक बन्ने नयाँ धरहरा भित्रबाट २२ तला र बाहिरबाट देख्दा ११ तलाको हुनेछ । धरहरा भिमसेन थापाले बनाएजस्तै देखिनेछ । साथै नयाँ बन्ने धरहरा भूकम्पप्रतिरोधात्मक पनि हुनेछ ।
धरहरामा पहिलो जस्तै भर्यांगसँगै लिफ्टको व्यवस्था पनि हुनेछ ।
वि.सं.२०७७ असोज २२ बिहीवार १७:५२ मा प्रकाशित
