हामी सबैकाे संसारन्यूज

काठमाडौँ । चन्द्रागिरी–११, सतुङ्गलस्थित जेसिस इन्टरनेसनल बोर्डिङ सेकेन्डरी स्कुलमा बाह्रौँ अन्तर्राष्ट्रिय योग दिवस २०२६ को साप्ताहिक कार्यक्रम अन्तर्गत आज एक विशेष र भव्य समारोह सम्पन्न भएको छ। विद्यालय प्राङ्गणमा आयोजित उक्त कार्यक्रममा कक्षा १ देखि ६ सम्मका विद्यार्थीहरूले योगका विभिन्न विधामा आफ्नो उत्कृष्ट कौशल प्रदर्शन गर्दै विद्यालयलाई योगमय बनाएका छन्।
‎
‎विगत एक हप्तादेखि चलिरहेको योग सप्ताह अन्तर्गत आजको मुख्य समारोह योगगुरु त्यागी अनिल मारुतको प्रत्यक्ष मार्गदर्शन तथा विद्यालय परिवारको सक्रिय उपस्थिति र सहयोगमा सम्पन्न भएको हो।
‎
‎कार्यक्रममा सानासाना विद्यार्थीहरूले योगलाई केवल शारीरिक व्यायाममा मात्र सीमित नराखी यसलाई कला र संगीतसँग जोडेर प्रस्तुत गरेका थिए। विद्यार्थीहरूद्वारा प्रस्तुत गरिएका मुख्य आकर्षणहरू निम्न बमोजिम थिए:
‎
फ्युजन योगा फर्मेसन: योग, नृत्य, ध्यान, आसन, प्राणायाम, चक्र आसन र सूर्य नमस्कारको आकर्षक फ्युजन।
‎सांगीतिक मन्त्र जप र वाचन: विद्यार्थीहरूको सुमधुर आवाजमा गुञ्जिएको मन्त्र वाचनले वातावरणलाई आध्यात्मिक र शान्त बनाएको थियो।
‎चित्रकला प्रदर्शन: योगको महत्त्व र यसका फाइदाहरू झल्काउने विद्यार्थीहरूद्वारा निर्मित विभिन्न चित्रकलाहरूको प्रदर्शनी।
‎यौगिक तथा मानव पिरामिड: सामूहिक योग फर्मेसन अन्तर्गत विद्यार्थीहरूले कडा मिहिनेतका साथ यौगिक पिरामिड, मानव पिरामिड र राष्ट्रियता झल्काउने विभिन्न मानव स्तुपहरू बनाएर कौशल प्रदर्शन गरे।
‎जडीबुटी चर्चा: स्वस्थ जीवनका लागि रैथाने जडीबुटीहरूको महत्त्व र उपयोगिताबारे विद्यार्थीहरूले व्यावहारिक जानकारी प्रस्तुत गरे।
‎
‎विद्यार्थीहरूको यो अद्वितीय र ऊर्जावान् प्रस्तुति हेरिसकेपछि विद्यालयकी इसिए (ECA) इन्चार्ज मञ्जु श्रेष्ठ र प्राइमरी कोर्डिनेटर सर्निमा श्रेष्ठले आफ्ना खुसी र कदरयुक्त भावनाहरू व्यक्त गर्नु भयो। जेसिस स्कुलले किताबी ज्ञान मात्र होइन, संस्कार र स्वस्थ जीवनशैलीको जग पनि बसाल्दैछ भन्ने प्रमाणित भएको पनि महसुस गर्नुभयो।
‎
‎उहाँहरूले आगामी दिनमा पनि यस्ता जीवनोपयोगी शिक्षाहरूलाई विद्यालयको अभिन्न अंग बनाइराख्ने प्रतिबद्धता जनाउनुभयो।
‎
‎कार्यक्रमको अन्त्यमा विद्यार्थीहरूले बनाएका मानव स्तुपहरूले राष्ट्रियताको बलियो सन्देश दिएका थिए। योगका माध्यमबाट शारीरिक र मानसिक विकास मात्र नभई सामूहिक भावना र देशप्रेमको भावना समेत जागृत गराउन सकिन्छ भन्ने उदाहरण जेसिस इन्टरनेसनल स्कुलका विद्यार्थीहरूले प्रस्तुत गरेका छन्।
‎
‎समारोहमा उपस्थित अभिभावक तथा शिक्षक शिक्षिकाहरूले विद्यार्थीहरूको अथक मिहिनेत र योगप्रतिको आकर्षणको उच्च प्रशंसा गर्दै तालीको गडगडाहटले उनीहरूको हौसला बढाएका थिए। समग्रमा, जेसिस स्कुलको यो योग उत्सव पर्यावरण, स्वास्थ्य र संस्कारको एउटा सुन्दर संगमको रूपमा सम्पन्न भएको छ।