हामी सबैकाे संसारन्यूज

काठमाडौं । अभिनेत्री ऋचा शर्माले पछिल्लो समय निरन्तर भएका बलात्कार तथा हत्याका घटनामा सरकारको मौनताप्रति प्रश्न उठाएकी छिन् । उनले सरकारका नेतृत्वकर्ता प्रधानमन्त्री ओलीलाई खुल्ला पत्र लेख्दै आफ्नो पनि छोरी जन्मिछ कि भन्ने डर लाग्न थालेको बताएकी छिन् । उनले भक्षकहरुको अनुकुलमा भएको कानूनले छोरीहरुको भविष्य अन्धकार भएको बताएकी छिन् ।

सामाजिक सञ्जालमार्फत खुल्ला पत्र लेख्दै अभिनेत्री शर्माले महिला राष्ट्रपति भएको देशमा बालिकाहरु दिनहुँ बलात्कृत हुँदै मारिनु अत्यन्तै दुःखद भएको बताएकी छिन् । उनले प्रधानमन्त्री ओलीलाई छोरी–नातिनीको आँखामा आँखा जुधाएर अवस्था बुझ्न आग्रह गरेकी छिन् ।

‘जनताको नभए पनि एकचोटी परिवारमा छोरी(नातिनीको आँखामा आँखा जुधाइ भनि हेर्नुस, की यो देशमा उनीहरु सुरक्षित छन ?’ शर्माले लेखेकी छिन्, ‘म सरकारमा विश्वास राख्ने मान्छे, हिजोआज मेरा पैताला डगमगाउदैछन, बाँकी तपाईहरु बुझकी !’

यस्तो छ उनले लेखेको खुल्ला पत्र

आदरणीय प्रधानमन्त्री ज्यू,

एउटा अभिनेत्री बाहेक, यो देशलाई माया गर्ने चेली, एउटा नारी भएकोले हिजोआज आफैलाई लाज लाग्न थालेको छ डर लाग्न थालेको छ, मन आत्तिन थालेको छ। ती अबोध बालिकाहरूको कल्पना मात्रैले पनि छाती पोलेर आउँछ। मलाई भोलीको दिनमा मेरो छोरी जन्मिएला भन्ने डर लाग्न थालेको छ । मलाई छोरीको लागि सुरक्षित ठाउँ बनाउन नसकुला कि भन्ने डर लाग्न थालेको छ ।

मलाई भोली छोरा पाउन नि डर लाग्न थालेको छ । मैले जति सँस्कार र अनुशासन सिकाउन खोजे पनि,यो देश र यहाँको कानूनले केहि नगर्ने रहेछ भन्ने मनस्थितिमा हुर्किन्छ कि भन्ने पीर पर्न थालेको छ । दिनहुँ स-साना नाबालकहरुलाई पनि बलात्कार गर्ने भक्षकहरु या त खुलेआम हिडेको या ढाकछोपले सामान्य जरिवाना र गन्न मिल्ने जेलका दिनहरु बिताएको देख्दा, एउटा नारी भएको हिजोआज आफैलाई लाज लाग्न थालेको छ ।

जून देशमा नारीलाई पुजिन्छ, जून देशमा सम्माननीय राष्ट्रपति स्वयं एक महिला हुनुहुन्छ, त्यस देशमा बलात्कार जस्तो जघन्य अपराधलाई, कानुन कार्यान्वयनक निकायहरूले यति सामान्य लिएको देख्दा हामी अझै सीताले अग्नि परिक्षा दिएको युगमै छौ झै लाग्छ। हामी टेक्नोलॉजीले चाहि विकसित भयौ तर अफसोस सोचले अझै पिछडिएका छौ । यहाँ बालिकाहरुलाइ सम्म खुलेआम राक्षसहरुले भोग लगाउँदा, हामी कठैबरा मात्र भएका छौ ।

जनताको नभए पनि एकचोटी परिवारमा छोरी-नातिनीको आँखामा आँखा जुधाइ भनि हेर्नुस, की यो देशमा उनीहरु सुरक्षित छन ? म सरकारमा विश्वास राख्ने मान्छे, हिजोआज मेरा पैताला डगमगाउदैछन। बाँकी तपाईहरु बुझकी!

निवेदक
एक आम नेपाली नारी
ऋचा शर्मा