Sansar News
काठमाडौं । सत्तारुढ नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले चीनले अघि सारेको बिआरआई परियोजना शान्ति, स्थायित्व र विकासका लागि महत्वपूर्णं हुने बताएका छन् । मंगलबार चिनियाँ कम्युनिष्ट पार्टी अन्तराष्ट्रिय विभागले आयोजना गरेको भर्चुअल कार्यक्रमलाई सम्बोधन गर्दै बेल्ट एण्ड रोड इनिसिएटिभ (बीआरआई) परियोजना शान्ति, स्थायित्व र विकासका लागि महत्वपूर्णं हुने बताएका हुन् ।
बीआरआई परियोजनाबाट चीन र नेपाल दुवै देशले फाइदा लिन सक्ने भनाई प्रचण्डको छ ।
कार्यक्रममा पूर्वप्रधानमन्त्री एवं जनता समाजवादीका नेता डाक्टर बाबुराम भट्टराईले बीआरआइले यस क्षेत्रको प्रगतिमा महत्वपूर्णं हुने बताए । बीआरआईले नेपालको भूराजनीतिक परिवर्तनमा महत्वपूर्णं भूमिका खेल्न सक्ने भट्टराईको भनाई छ ।
कार्यक्रममा राष्ट्रिय सभाका अध्यक्ष गणेशप्रसाद तिमिल्सिनाले आफ्नो धारणा राखेका थिए । कार्यक्रमा चिनियाँ कम्युनिष्ट पार्टी अन्तराष्ट्रिय विभाग मन्त्री सोङ ताओ, चिनियाँ कम्युनिष्ट पार्टी तिब्बत कमिटीका सेक्रेटरी वु यिंगजीलगायतले सम्बोधन गरेका थिए ।
चिनियाँ राष्ट्रपति सी जिनपिङको नेपाल भ्रमणको वाषिकोत्सवको अवसरमा चिनियाँ कम्युनिष्ट पार्टी अन्तराष्ट्रिय विभागले मंगलबार संयुक्त परामर्श सम्मेलन गरेको हो ।
वि.सं.२०७७ कात्तिक ४ मंगलवार १७:२१ मा प्रकाशित
