हामी सबैकाे संसारन्यूज

काठमाडौं । पछिल्लो २४ घण्टामा मात्रै देशभर ३ हजार ६३७ जना कोरोना संक्रमित थपिएका छन् । स्वास्थ्य तथा जनसंख्या मन्त्रालयका प्रवक्ता प्रा डा जागेश्वर गौतमले नियमित पत्रकार सम्मेलनमार्फत पछिल्लो २४ घण्टामा ३ हजार ६३७ मा कोरोना संक्रमण पुष्टि भएको जानकारी दिए ।

उनका अनुसार पछिल्लो २४ घण्टामा मात्रै काठमाडौं उपत्यकामा थप १५५२ जनालाई कोरोना संक्रमण देखिएको छ । काठमाडौंमा १२८३ जना, भक्तपुरमा ११२ जना र ललितपुरमा १५७ जना नयाँ संक्रमित भेटिएको गौतमले जनाए ।

प्रवक्ता गौतमका अनुसार पछिल्लो २४ घण्टा थपिएका नयाँ संक्रमितसहित देशभर सक्रिय कोरोना संक्रमितको संख्या ४५ हजार नजिक पुगेको छ । बिहिबारसम्म सक्रिय संक्रमितको संख्या ४४ हजार ८७७ पुगेको प्रवक्ता गौतमले जानकारी दिए ।

जसमा संस्थागत आइसोलेशनमा १३ हजार ३४९ र होम आइसोलेसनमा ३१ हजार ५३८ रहेको उनले जनाए ।

योसँगै देशभरका हालसम्म कोरोना संक्रमित हुनेको कुल संख्या १ लाख ४८ हजार ५०९ पुगेको छ । देशभर कोरोना निको हुनेको संख्या पनि १ लाख २ हजार बढि छ । प्रवक्ता गौतमका अनुसार पछिल्लो २४ घण्टामा मात्रै थप ३ हजार २१५ जना संक्रमित कोरोना मुक्त भएका छन् ।