हामी सबैकाे संसारन्यूज

नारीलता
तिमी समग्र समानताको कुरा गर्छ्यौ
तर
हामीमा निरपेक्ष समानता हुनसक्छ
म बिश्वास गर्दिन

हिड्ने पाइला उस्तै भएपनि
रूप, गुण र बिशेषतामा हामी फरक छौ
प्राकृतिक कर्तब्य, दायित्व र पहिचानमा
उभिने ठाउँ यौटै भएपनि
हामी अलग अलग हौ र फरक अस्तित्वमा छौ

तिमीले स्वीकार्नु पर्छ
हामिमा समानता हुन सक्दैन

हेर,
लतापुष्प चिमोट्न तन्किएका औंलाहरू
हातको लम्बाई लामो भएपनि
हत्केलामा छुट्टिएर
तिमीतिर औंलाहरू तन्किएका छन्
स्वार्थमा
एकैठाउँमा जम्मा भएका औलाहरू
तिमीलाई चुँड्ने बित्तिकै छुट्टिन्छन्
फेरि एकै ठाउँमा आउन
सबैको स्वार्थ मिल्नु नै पर्छ
नमिलेसम्म अलग अलग पहिचानका
औला भएरै बाँच्छन

नारीलता !
तिमी आफै फुलेको बोटमा हेर
काँडाहरू फुलेका छैनन्
फुल्दैनन्
त्यसरी नै तिमी फूल
कमलो देहमा हाँसेकी छौ
तर
काँडा जसरी तिखारीन सक्दिनौ
तिखो टुप्पोमा उम्रिएको मलाई हेर
तिखार्नु पर्दैन
तर
जब बयस्क हुन्छ फूलको बोट
तिमी कोपिला फक्रिन्छ्यौ
र फूल चिन्छ दुनियाँ

हामी दुबैलाई जन्माउने फूलको बोट नै हो
चिनेपछि छुट्याउँछ दुनियाँले
तिमी नारीलता
म काँडा
जहाँ असमान छन
अन्योन्याश्रित छन् हाम्रा सम्बन्धहरू

नारीलता ! तिमी फूल्छ्यौ
फल्छ्यौ
सत्य हो
फूलको सृष्टि तिम्रै वरिपरि पूर्ण घुमेको छ

तिमी आफै सिंहो हात हौ
फरक चिनारीका औलाहरू देखि देखि
जिद्दि नगर
हत्केला यौटै भएपनि
औलाहरू समान हुन नसके जस्तै
उही धरातलमा फूलेका
काँडा र फूलमा समानता हुँदैन ।