हामी सबैकाे संसारन्यूज

काठमाडौं । स्वास्थ्यमन्त्री भानुभक्त ढकालविरुद्व अदालतको अवहेलना गरेको भन्दै रिट निवेदन दर्ता भएको छ । कोभिड–१९ को उपचार निःशुल्क गर्न सर्वौच्चले दिएको आदेश उल्लंघन गरेको भन्दै रिट निवेदन दर्ता भएको हो । अधिवक्ता लोकेन्द्र ओली र केशरजंग केसीले आइतबार सर्वौच्च अदालतमा रिट निवेदन दिएका थिए ।

निवेदकले प्रधानमन्त्री केपी शर्मा ओली र स्वास्थ्यमन्त्री ढकाललाई विपक्षी बनाएर रिट निवेदन दिएका थिए । तर, निवेदन दर्ता हुँदा भने प्रधानमन्त्री ओलीको नाम हटाएर मन्त्री ढकालको मात्रै राखिएको छ ।

सर्वौच्च अदालतले गत असोज १५ मा स्वास्थ्य तथा जनसंख्या मन्त्रालयको नाममा कोभिड–१९ को सबै उपचार निशुल्क गर्न परमादेश जारी गरेको थियो । तर, मन्त्रालयले गत कात्तिक २ मा मन्त्रिपरिषदको निर्णय भन्दै विपन्न, असहाय, अति अपाङ्गता भएका, ७० वर्ष नाघेका जेष्ठ नागरिकको परीक्षण र उपचार निशुल्क गर्ने तर अन्यको नगर्ने निर्णय गरेको थियो ।

रिटमा यहि विषयलाई आधार बनाउँदै अदालतको आदेशको उल्लंघन र अनादर भएको भन्दै मन्त्री ढकाललाई अधिकतम १ वर्ष कैद र १० हजार जरिवाना गर्न माग गरिएको छ । साथै असोज १५ को परमादेश तुरुन्त कार्यान्वयन लागि आदेश गर्न माग पनि गरिएको छ ।