हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)का प्रवक्ता नारायणकाजी श्रेष्ठले पार्टीभित्र देखिएको आन्तरिक विवादमा स्वस्थ र रुपान्तरणमुखी छलफल गर्न सबैसँग आग्रह गरेका छन् । उनले विवाद चर्किरहँदा तैं चुप मै चुप गरेर नबस्न पनि सबैसँग आग्रह गरेका छन् ।

सामाजिक सञ्जालमार्फत विवादको विषयमा झगडा तथा गालिगलौजमा नउत्रन पनि उनको आग्रह छ । ‘पार्टीभित्रको छलफल्, बहस र अन्तर्सँघर्षलाई ब्यक्तिगत गालिगलौज र आरोप प्रत्यारोपको रुप नदिऔं, राष्ट्र र जनताको हितलाई केन्द्रमा राखेर बिचार,नीति र प्रबृत्तिमा आधारित भई स्वस्थ एवं रुपान्तरणमुखी छलफल गरौं’, श्रेष्ठले भनेका छन्, ‘तैं चुप मै चुप पनि नगरौं, तुम शेर तो हम सवा शेर झै ब्यक्तिगत झगडा तथा गालिगलौज पनि नगरौं ।’

प्रधानमन्त्री तथा पार्टी अध्यक्ष केपी शर्मा ओलीले पार्टी विभाजन गर्दा व्यक्तिगत कटुता नराखौं भनी राखेको प्रस्ताव भने सही भएको तर सल्लाहमा पार्टी विभाजन गरौं भनेको गलत भएको भनाई श्रेष्ठको छ । उनले व्यक्तिगत कटुता नराखौं भन्ने बुझाईलाई पार्टी एकता गराउन प्रयोग गर्न पनि सुझाव दिएका छन् ।

उनले भनेका छन्, ‘सल्लाह गरेर पार्टी अलग अलग गरौं भन्ने कुरा जहाँसुकै बाट आएको भएपनि सही होइन । तर त्यसमा अन्तर्निहित एउटा पक्ष, अर्थात ब्यक्तिगत कटुता सहितको ब्यक्तिगत बिषय नबनाऔं भन्ने कुरा सही छ र त्यसलाई पार्टी बिभाजन नगरी अर्को सन्दर्भमा सकारात्मक रुपले प्रयोग गरौं।’