Sansar News
काठमाडौं । अमेरिकामा राष्ट्रपति चुनावको मतपरिणाम निर्णायक अवस्थामा पुगेको छ । पछिल्लो मतपरिणामअनुसार डेमोक्रेटिक पार्टीका उम्मेदवार जो बाइडन जित नजिक देखिएका छन् । उनी हालका राष्ट्रपति तथा रिपब्लिकन उम्मेदवार डोनाल्ड ट्रम्पभन्दा ३९ भोटले अगाडि छन् ।
न्यूयोर्क टाइम्सका अनुसार ४४ राज्यको मतपरिणाम सार्वजनिक हुँदा डेमोक्रेटिक उम्मेदवार जो बाइडनले २५३ भोट ल्याएका छन् । जहाँ रिपब्लिकन उम्मेदवार ट्रम्पले २१४ भोट मात्रै पाएका छन् । अब ६ राज्यको मतपरिणाम आउन बाँकी छ ।
बाइडनको नाम सबैभन्दा बढि भोट पाउने ऐतिहासिक उम्मेवार
अमेरिकी राष्ट्रपति चुनावको मत गन्ने काम जारी छ । यसबीच डेमोक्रेटिक पार्टीका उम्मेदवार जो बाइडनले एक नयाँ रेकर्ड बनाएका छन् । बाइडनले अमेरिकाको इतिहासमा नै भएका चुनावमा सबैभन्दा बढि भोट पाउने रिकर्ड बनाएका छन् ।
अमेरिकी चुनावी इतिहासमा कुनै पनि राष्ट्रपति पदका उम्मेदवारले बाइडनले पाए जति मत पाएका थिएनन् । हालसम्मको मतपरिणाममा बाइडनले ७ करोड भोट पाएका छन् । जहाँ ट्रम्पको भोट ६.८ करोड छ ।
जितको नजिक छन् बाइडन
चुनावी नतिजाअनुसार डेमोक्रेटिक पार्टीका उम्मेदवार जो बाइडन जितको नजिक देखिएका छन् । न्यूयोर्क टाइम्सले सार्वजनिक गरेको परिणामअनुसार जो बाइडनले हालसम्म २५३ इलेक्टोरल भोट पाएका छन् । उनलाई जित्नको लागि (२७०) अब १७ भोटको मात्रै खाँचो छ ।
रिपब्लिकन पार्टीका उम्मेदवार तथा हालका राष्ट्रपति डोनाल्ड ट्रम्पलाई हालसम्म २१४ इलेक्टोरल भोट प्राप्त भएको छ । जसको हिसाबमा उनलाई जित्न ५६ भोट प्राप्त गर्नुपर्छ ।
यी हुन् मतगणना जारी रहेका राज्य
चुनावको मतपरिणाम चाखलाग्दो ढंगले अगाडि आईरहेको छ । केहि राज्यमा भोटको गिन्ती हाल पनि जारी छ ।
हाल अलास्का, एरिजोना, जोर्जिया, नेवाद, उत्तर कैरोलिना र पेनसिल्वेनियामा मतगणना जारी छ । जसमध्ये अलास्का, जोर्जिया, उत्तर कैरोलिना र पेनसिल्वेनियामा ट्रम्प अगाडि छन् । एरिजोना र नेवादमा बाइडन अगाडि छन् ।
वि.सं.२०७७ कात्तिक २० बिहीवार १४:१९ मा प्रकाशित
