हामी सबैकाे संसारन्यूज

२६ पुस, भक्तपुर । लेखापढी व्यवसायीको विरोधका कारण दुई दिनदेखि ठप्प मालपोत कार्यालय भक्तपुरको काम कारबाही मङ्गलबारबाट सञ्चालन हुने भएको छ ।

शनिबारको एक राष्ट्रिय दैनिक पत्रिकामा मालपोत कार्यालय प्रमुख कमलप्रसाद तिमल्सिनाको भनाइ भनी प्रकाशित समाचारले लेखापढी व्यवसायीको मानहानी भएको भन्दै उनीहरूले आइतबारदेखि कलम बन्द गरेर मालपोतको सेवा ठप्प बनाएको थियो ।

व्यवसायी र मालपोत अधिकृतबीच सोमबार भएको वार्तामा तीनबुँदे सहमति भएपछि व्यवसायीले कलम बन्द कार्यक्रम फिर्ता लिएको लेखापढी व्यवसायी सङ्घ भक्तपुरका अध्यक्ष राजकुमार दाहालले जानकारी दिनुभयो । उहाँले भन्नुभयो, “मालपोतसँग हाम्रो सहमति भएको छ । मङ्गलबारदेखि काम सञ्चालन हुनेछ ।”

वार्तामा मालपोत प्रमुख तिमल्सिनाले समाचारको खण्डन गर्दै सो खण्डन सोही पत्रिकालगायत अन्य सञ्चारमाध्यममा प्रकाशित गर्ने, लेखापढी व्यवसायी र कार्यालयका कर्मचारीबीच एकअर्काको भावना र मर्यादाको ख्याल गर्दै एकअर्काको सम्मानमा आँच आउने कुनै अभिव्यक्ति र क्रियाकलाप नगर्ने, मालपोत कार्यालयबाट प्रदान गरिने सेवा सुविधालाई चुस्तदुरुस्त र प्रभावकारी बनाई जनगुनासो समाधान गर्न १५ दिनभित्र सुझाव दिनेगरी एक कार्यदलसमेत गठन गर्ने सहमति भएको छ । वार्तामा प्रमुख तिमल्सिनाले गल्ती भएको स्वीकार गरेको दाहालले बताउनुभयो ।

मालपोत अधिकृत कृष्णप्रसाद जोशीको संयोजकत्वमा गठन भएको कार्यदलमा सदस्य सचिव लेखापढी व्यवसायी सङ्घ भक्तपुरका अध्यक्ष दाहाल, सचिव रामकाजी पाटी, नेपाल बार एशोसियसन भक्तपुरका पूर्वउपाध्यक्ष रवीन्द्र प्रधान र मालपोत अधिकृत अरुणोदयमान रञ्जीत सदस्य रहेका छन् ।