Sansar News
२६ कात्तिक, काठमाडौं । कोरोना महामारीका कारण तलब आधा काटिएको र विभिन्न शिर्षकमा दिइने भत्ता तथा सुविधा पनि काटिएपछि यतिबेला मन्त्रीहरु समस्यामा परेका छन् ।
तलब भत्ता काटिएपछि घरको खर्च कसरी चलाउने भनेर गुनासो पोख्न नपाउँदै प्रधानमन्त्रीले ‘घरको चामल मगाएर खान’ मन्त्रीहरुलाई उर्दी दिएको समाचार बुधबारको जनआस्था साप्ताहिकमा समाचार छ ।
मन्त्रीहरुको आधा तलब काटिएपछि के खाने ? पाहुना कसरी पाल्ने, मतदाताका बीच कसरी जाने ? ठूला चाडपर्वमा खर्च कसरी चलाउने भन्ने कुरा उठाउन नपाउँदै प्रधानमन्त्रीले यस्तो उर्दी दिएपछि सोमबार साँझ क्याविनेट बैठकमा मन्त्रीहरु चुप रहे ।
आधा तलब कोभिड कोषमा गएको र पार्टीको लेवि पनि तिर्नुपर्ने हुनाले लप्पन छप्पन नजान्ने र आउने स्रोत नभएका मन्त्रीहरुलाई भने गाह्रै पर्ने गरेको छ ।
त्यस्तै प्रधानमन्त्रीले पनि चैतदेखि मासिक तलब नबुझेको भन्ने गरेका छन् । तर, विदेशका महँगा अस्पतालमा हुने उपचार खर्चको जोहो कसरी भइरहेको छ ? व्यक्तिगत खर्च कसरी चल्छ ? कसैकसैले हँस्यौली गर्दै भन्ने गरेका छन् ‘पत्नी राधिकाको राष्ट्र बैंकबाट आउने महिनावारी पेन्सनबाट त चल्ने होला नि !’
वि.सं.२०७७ कात्तिक २६ बुधवार ०८:५० मा प्रकाशित
