हामी सबैकाे संसारन्यूज

२८ कार्तिक, काठमाडौँ । विभिन्न २१ राजनीतिक संगठनहरुले अमेरिकी संस्था एमसीसी खारेजीको माग गरेका छन् ।

सरकारले गरेका राष्ट्रघाती र जनविरोधी कामका विरुद्धमा कार्यगत एकता गर्ने निर्णय गर्दै उनीहरुले अमेरिकी संस्था एमसीसीसँग नेपालका विभिन्न सरकारद्वारा विभिन्न समयमा गरिएका राष्ट्रघाती सम्झौताको खारेजीको माग गरेका छन् ।

कार्तिक २७ मा सम्पन्न संयुक्त बैठकले सरकारविरुद्ध मंसिर ७ गते माइतीघर मण्डलमा विरोध कार्यक्रमको आयोजना गर्ने निर्णय गरेको देशभक्त जनगणतान्त्रिक मोर्चाका अध्यक्ष सी.पी गजुरेलद्वारा जारी प्रेस विज्ञप्तिमा जनाइएको छ ।

त्यस्तै उनीहरुले भारतले अतिक्रमण र कब्जा गर्दै आएको लिम्यिाधुरा–कालापानी–लिपुलेक, सुस्ता, महेशपुर आदि भूभागमाथि नेपालको स्वामित्व कायम गर्ने, कोभिड–१९ को रोकथाम, नियन्त्रण र निःशुल्क उपचार, बेरोजगार र विपन्न वर्गलाई खानालगायत न्यूनतम सुविधा, रोजगारीको व्यवस्था, निःशुल्क शिक्षा र स्वास्थ्यको व्यवस्था, उखु किसानको बक्यौता रकम तुरुन्त दिलाउने आदि विषयमा कार्यगत एकताले गर्दै आएको संघर्षलाई अझ सशक्त बनाउने निर्णय गरेको पनि उल्लेख छ ।

यसका निमित्त आगामी मंसिर ७ गते दिनको १ बजे काठमाडौंको माइतीघर मण्डलामा विरोध कार्यक्रमको आयोजना गर्ने र यसै प्रकारको कार्यक्रम देशका सबै प्रदेशले कम्तीमा एक–एक स्थानमा समेत आयोजना गर्न प्रयत्न गरिने विज्ञप्तिमा भनिएको छ । ।