हामी सबैकाे संसारन्यूज

१५ मंसिर, पोखरा । कोरोना संक्रमणबाट गण्डकी प्रदेशमा आज ५ जनाको मृत्यु भएको छ ।

मृत्यु हुनेमा कास्कीको पोखरा उपमहानगरपालिकाका ४ जना र स्याङजाको वालिङ नगरपालिकाका १ जना रहेका छन् ।

प्रदेशको स्वास्थ्य निर्देशनालयका अनुसार आज पोखरा महानगरपालिका ३ का ६५ वर्षीया कोरोना संक्रमित पुरुषको उपचारका क्रममा मृत्यु भएको छ । मंसिर ८ गते कोरोना संक्रमण पुष्टि भएपछि पोखरा स्वास्थ्य विज्ञान प्रतिष्ठानमा उपचार गराइरहेका उनको आइतबार दिउँसो ४ः३३ मा मृत्यु भएको हो ।

त्यसैगरी पोखरा महानगरपालिका १६ की ५७ वर्षीया महिलाको पनि सोमबार बिहान ४ बजे उपचारकै क्रममा मृत्यु भएको छ । मंसिर १२ गते संक्रमण पुष्टि भएपछि चरक अस्पताल पोखरामा उपचार गराउने क्रममा मृत्यु भएकी उनमा थाइराइड, मिर्गौला लगायतका समस्या रहेको अस्पतालले जनाएको छ ।

त्यसैगरी पोखरा महानगरपालिका १८ का ५१ वर्षीय पुरुषको पनि उपचारकै क्रममा मृत्यु भएको छ । मंसिर ११ गते कोरोना संक्रमण भएपछि पोखरा स्वास्थ्य विज्ञान प्रतिष्ठानमा भर्ना भइ उपचार गराइरहेका उनको आइतबार बेलुका ९ः४५ मा मृत्यु भएको हो ।

त्यस्तै स्याङजा जिल्ला वालिङ नगरपालिका १४ का ६७ वर्षीय कोरोना संक्रमित पुरुषको पनि उपचारकै क्रममा मृत्यु भएको छ । मंसिर ११ गते कोरोना संक्रमण पुष्टि भएपछि पोखरा स्वास्थ्त्य विज्ञान प्रतिष्ठानमा उपचार गराइरहेका उनको सोमबार दिउँसो २ः१० मा मृत्यु भएको अस्पतालले जनाएको छ ।

पोखराउपमहानगरपालिका १३ की ७८ वर्षीया महिलाको पनि संक्रमणको उपचारका क्रममा मृत्यु भएको छ । सोमबारै कोरोना संक्रमण पुष्टि भएपछि मणिपाल अस्पतालमा भर्ना भइ उपचार गराइरहेकी उनको सोमबार दिउँसो १ः३० मा मृत्यु भएको स्वास्थ्य निर्देशनालय पोखराले जनाएको छ ।

पछिल्लो पटक थपिएका ५ जनासँगै गण्डकी प्रदेशमा संक्रमणबाट ज्यान गुमाउनेको संख्या १५९ पुगेको छ ।