हामी सबैकाे संसारन्यूज

१९ मंसिर, काठमाडौं । लण्डन क्लब आर्सनलले युरोपा लिगको अन्तिम ३२ मा स्थान बनाउन सफल भएको छ । गएराति भएको खेलमा र्‍यापिड विएनालाई ४-१ ले पराजित गर्दै आर्सनलले समूहमा अपराजित यात्रा कायम राखेको छ ।

आर्सनलको जितमा खेलको १०औं मिनेटमा एलेक्जान्डर लाजाकाटे, १८औं मिनेटमा पाब्लो मारी, ४४औं मिनेटमा एडवार्ड एनकेतिह र ६६औं मिनेटमा एमिली स्मिथ रोवेले गोल गरेका थिए। र्‍यापिडका लागि भने कोया कितागावाले खेलको ४७ औं मिनेटमा सान्त्वना गोल गरे।

आर्सनलले आफ्नो घरेलु मैदानमा जित निकालेको उक्त खेलमा २७१ दिनपछि दर्शक मैदानमा उपस्थित भएका थिए । सुरक्षा मापदण्डको पालना गर्दै मास्क र भौतिक दुरी कायम गरी दुई हजार दर्शक मैदानमा उपसस्थित थिए ।

सोहि समुहको अर्को खेलमा मोल्डेले डुनडकलाई ३-१ ले पराजित गर्दै दोस्रो स्थानमा उक्लेको छ ।