Sansar News
काठमाडौं । सत्तारुढ नेपाल कम्युनिष्ट पार्टी (नेकपा)का दुवै अध्यक्षले राखेको प्रतिवेदन अब स्थायी समिति बैठकमा छलफल हुने भएको छ । शनिबार सम्पन्न नेकपाको सचिवालय बैठकले दुवै प्रतिवेदनमाथि स्थायी समितिको बैठकमा छलफल गरि निष्कर्ष निकाल्ने निर्णय गरेको हो ।
नेकपाका प्रवक्ता नारायणकाजी श्रेष्ठले जानकारी दिएअनुसार आइतबार १ बजेदेखि बस्ने स्थायी समितिको बैठकमा दुवै प्रतिवेदन छलफलको लागि प्रस्ताव हुनेछन् ।
‘पार्टीको केन्द्रिय सचिवालयको बैठकले पूर्वनिर्धारित भोली १ बजे स्थायी कमिटीको बैठकलाई पार्टी केन्द्रिय कार्यालय धुम्बाराहीमा नै हुने कुरालाई निश्चित गर्दै उक्त बैठकमा नै अब पार्टीको संकट र त्यसको निवारणसम्बन्धमा छलफल गरेर निष्कर्ष निकाल्ने प्रक्रिया अगाडि बढाईने निष्कर्ष निकालेको छ’, बैठक पछि पत्रकारसँगको कुराकानीमा श्रेष्ठले भने, ‘पार्टीको संकट निवारणका निम्ति पार्टीमा अहिलेसम्म प्रस्तुत भएका प्रस्तावहरु स्थायी कमिटीमा पेश गरेर छलफल हुनेछन् ।’
गत कात्तिक २८ मा बसेकाे सचिवालय बैठकमा अध्यक्ष पुष्पकमल दाहाल ‘प्रचण्ड’ले ओलीमाथि विभिन्न आरोप लगाउँदै आफ्नो १९ पृष्ठ लामो प्रस्ताव छलफलको लागि अघि सारेका थिए । जसको प्रतिउत्तर स्वरुप मंसिर १३ मा बसेको सचिवालय बैठकमा प्रधानमन्त्रीसमेत रहेका अध्यक्ष केपी शर्मा ओलीले ३८ पृष्ठ लामो प्रस्ताव अघि सारेका थिए । ओलीले अघि सारेको प्रस्तावमा प्रचण्डमाथि निकै गम्भिर प्रकृतिका राजनीतिक तथा व्यक्तिगत आरोपहरु लगाइएको छ ।
दुवै प्रस्तावमाथि सचिवालयमा छलफल भईरहेको थियो । तर, सचिवालयले निष्कर्ष निकाल्न नसकेसँगै स्थायी समितिमा लगिने निर्णय भएको हो ।
सम्बन्धित समाचार
वि.सं.२०७७ मंसिर २० शनिवार १७:०२ मा प्रकाशित
