हामी सबैकाे संसारन्यूज

जर्मनीको बर्लिन सहकी एक दानी महिलाले आफ्नो ५५ करोड बढीको सम्पत्ती मृत्युपूर्व आफ्ना छिमेकीको नाममा गरेको समाचार छ ।
रेनेट नामकी ती वृद्ध महिलाले त्यतिधेरै सम्पत्ती आफ्ना छिमेकीको नाममा गरेकी हुन् । उनको मृत्यु २०१९ को डिसेम्बर महिनामा भएको थियो ।

रेनेट सन् १९७५ देखि आफ्ना श्रीमान अल्फ्रेड वेसेलका साथ मध्य जर्मनीको वाल्डोल्स्प्स वेपरफेल्डेन जिल्लामा रहेकी थिइन् । उक्त जिल्लामा ६ गाउँ रहेको छ । उनका श्रीमानले शेयर बजारमा पैसा लगानी गरेर मनग्ये सम्पत्ती कमाएका थिए । २०१४ मा रेनेटका श्रीमानको मृत्यु भएपछि उनी २०१६ देखि फ्रयांकफटको नर्सिङ होममा बस्दै आएकी थिइन् ।

स्थानीय संचार माध्यमका अनुसार ती वृद्धाको २०१९ डिसेम्बरमा ८१ वर्षको उमेरमा मृत्यु भएको थियो । उनको सम्पत्तीको उत्तराधिकारी रहेकी उनको बहिनीको पनि पहिले नै मृत्यु भएपछि ती वृद्धाले आफ्नो सारा सम्पत्ती आफ्ना छिमेकीको नाममा गरेको समाचार छ ।

यस्तो कुरा गत अप्रिलमा जिल्ला प्रशासनले उनको सम्पत्तीका बारेमा जानकारी दिएपछि बाहिर सार्वजनिक भएको हो । रेनेटले आफ्नो बैंक ब्यालेन्स, शेयर र अन्य सम्पत्ती छिमेकीको नाममा बाँडिदिएकी थिइन् । तर उक्त सम्पत्ती ती छिमेकीले आफ्नो व्यक्तिगत खर्च गर्न भने पाउने छैनन् । उक्त सम्पत्ती त्यो क्षेत्रको विकासको लागि खर्च गर्न पाउने गरी उनले छिमेकीको नाममा छोडेकी थिइन् ।