हामी सबैकाे संसारन्यूज

२३ मंसिर, काठमाडौं । नेपालमा श्रीमानको दुर्घटनामा मृत्यु भएको खबरले विक्षिप्त बनेकी एक नेपाली चेलीले साइप्रसमा आत्महत्या गरेकी छन् ।

साइप्रसको लार्नाका सहरमा घरेलु कामदारका रुपमा कार्यरत दोलखाकी शु्क्री तामाङले सोमबार आत्महत्या गरेकी हुन् ।

दोलखाको गौरीशंकर गाउँपालिका वडा नं ८ खरे घर भइ साइप्रसमा घरेलु कामदारका रुपमा कार्यरत तामाङका श्रीमान (बोलेरो चालक) २१ वर्षीय सुविन्द्र तामाङको आइतबार दोलखाकै विगु गाउँपालिकामा सडक दुर्घटनामा परेर मृत्यु भएको अर्कोदिन (सोमबार) उनले आत्महत्या गरेकी हुन् ।

१६ महिना अगाडि साएइप्रस पुगेकी तामाङले श्रीमानको मृत्युको खबरपछि टिकटकमा एक भिडियो अपलोड गर्दै ‘मेरो मुटु हामी सँगै हुने हैं ।

सरी मेरो आमा बुवा सासु आमा ससुरा बाबा साथीभाइहरु म मेरो मुटुसँगै जान्छु ।’ भनेर श्रद्धान्जलीसहितको गीत अपलोड गरेकी थिइन् ।

त्यसैगरी साइप्रसका लागि नेपाली कन्सुलेट डा. रामजीवन पञ्जियारले पनि उनले आत्महत्या गरेको तर, अनुसन्धानकै क्रममा रहेकोले आत्महत्याको कारण पत्ता नलागेको संसारन्युजलाई जानकारी दिएका छन् । ‘प्रहरीले अनुसन्धान गर्दैछ । अनुसन्धानपछि मात्र यहिकारण हो भनेर भन्न सकिन्छ, डा. पञ्जियारले भने, ‘सामाजिक संजालमा उनको अपडेट अनुसार पारिवारीका कारण आत्महत्या गरेको देखिन्छ ।’

कन्सुलेट डा. पञ्जियारले परिवारले शव पठाइदिनु भन्ने अनुरोध गरेर पत्र पठाइसकेकोले प्रहरी अनुसन्धान सकिएपछि शब नेपाली पठाइने बताए ।

यस विषयमा गैरआवासीय नेपाली संघ साइप्रसका संरक्षक सुवास मल्लले यसबारेमा साइप्रस प्रहरीले अनुसन्धान गरिरहेको र पुर्ण जानकारी आउन बाँकी रहेको बताएका छन् । ‘उहाँको पारिवारीक कारणले यस्तो कदम उठाउनु भएको जस्तो लाग्छ श्रीमानको दुर्घटनामा मृत्यु भएको खबर पाएपछि विक्षिप्त बन्नु भएको उहाँले टिकटकमा यस्तै पीडा पोख्नु भएको छ ।’