हामी सबैकाे संसारन्यूज

काठमाडौं । कांग्रेस सभापति शेरबहादुर देउवाले राजतन्त्रको पक्षमा भईरहेको प्रदर्शनप्रति प्रश्न उठाएका छन् । उनले राजाको पक्षमा भईरहेको प्रदर्शनप्रति प्रधानमन्त्री ओलीको संलग्नता त होइन् भन्ने आशंका पनि व्यक्त गरे ।

सोमबार सरकारविरुद्व हेटौंडामा गरेको प्रदर्शनलाई सम्बोधन गर्दे सभापति देउवाले भने, ‘राजा आऊ, देश बचाऊ भनेर कराइरहेका छन्, कहाँबाट हिम्मत आयो ?’

देउवाले राजतन्त्रको पक्षमा भईरहेको प्रदर्शनको जिम्मेवार सरकार नै भएको बताए । ‘राजाले त्यसबेला थुने, जेलमा मलाई राखे, अहिले राजा आऊ, देश बचाऊ भन्ने ?,’ उनले भने, ‘कम्युनिष्ट सरकारका कारण नै राजा आऊ, देश बचाऊ भनिरहेका छन्,यसमा ओली सरकार जिम्मेवार छ, कांग्रेस राजाका पक्षमा छैन।’

देउवाले सडक प्रदर्शन गर्नु कांग्रेसको बाध्यता भएको भन्दै प्रदर्शनको जिम्मेवार सरकार नै हुने बताए । उनका अनुसार अहिले देशमा एकदलीय सर्वसत्तावादी शासन जस्तै भएको छ ।

‘मैले चुनावका बेला कम्युनिस्ट जितेपछि बोल्न पाइँदैन, हाँस्न र रुन पाइँदैन भनेको थिएँ, अहिले स्थिति त्यस्तै छ, एकदलीय सर्वसत्तावादी शासन जस्तै भएको छ’ देउवाले भने ।