हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)को आजको स्थायी समितिको बैठक सकिएको छ । प्रधानमन्त्री निवास बालुवाटारमा बसेको बैठक आगामी पुस ५ गते बस्ने गरि सकिएको पार्टी प्रवक्ता नारायणकाजी श्रेष्ठले जानकारी दिए ।

उनका अनुसार पार्टीको केन्द्रीय समितिको बैठक पुस १० देखि बस्नेछ । ‘अब स्थायी समितिको बैठक पुस ५ बस्नेछ, पुस ५ गतेको लागि निर्धारित गरिएको केन्द्रीय कमिटीको बैठक पुस १० गते बस्ने भएको छ’, उनले भने ।

बुधबार बसेको बैठकले संवैधानिक परिषदसम्बन्धी अध्यादेश फिर्ता लिने निर्णय सर्वसम्मतीले लिएको प्रवक्ता श्रेष्ठले जानकारी दिएका छन् ।

बैठकपछि पत्रकारसँगको कुराकानीमा उनले भने, ‘आजको बैठकले सरकारले जारी गरेको संवैधानिक परिषदसम्बन्धी अध्यादेश फिर्ता लिने साथसाथै राष्ट्रपतिसक्षम संसदको माग गरेर पेश गर्ने भनिएको आवेदन फिर्ता गर्ने सर्वसम्मत निर्णय गरेको छ ।’

उनका अनुसार मंगलबार प्रधानमन्त्रीले राखेको संवैधानिक परिषदको बैठकमा कुनै निर्णय लिएका छैनन् । जसबारे बैठकमा प्रधानमन्त्री केपी शर्मा ओली स्वंयले जानकारी गराएका थिए ।