हामी सबैकाे संसारन्यूज

२ पुस, काठमाडौं। गएराति भएको खेलमा बार्सिलोनाले शीर्ष स्थानमा रहेको रियल सोसिडाडलाई पराजित गरेको छ । बार्सिलोनाले सोसिडाडमाथि २-१ को पुनरागमन जित निकल्दै ला लिगा अंक तालिकाको पाँचौ स्थानमा उक्लेको छ ।

बार्सिलोनाको घरेलु मैदान क्याम्प नोउमा सोसिडाडको लागि खेलको २७औं मिनेटमा विलियन जोसले गोल गर्दै अग्रता दिलाएका थिए । पहिलो हाफकै ३१ औं मिनेटमा जोर्डी अल्बाले गोल गर्दै खेल बराबरी बनाएका थिएभने ४३औं मिनेटमा अल्बाकै पासमा डे जोङले गोल गर्दै बार्सिलोनालाई २-१ को अग्रता दिलाएका थिए । दोस्रो हाफमा कुनै पनि गोल हुन नसक्दा बार्सिलोनाले समग्रमा २-१ ले खेल आफ्नो पक्षमा पार्न सफल भयो ।

जितपछि १२ खेलमा ६ जित, २ बराबरी र ४ हारको नतिजा सहित बार्सिलोनाले २० अंक जोड्दै अंक तालिकाको पाँचौ स्थानमा उक्लेको छ । उता १४ खेलबाट २६ अंक जोडेको सोसिडाड भने हारपछि दोस्रो स्थानमा झरेको छ । अंक तालिकाको शीर्ष स्थानमा रहेको एट्लेटिको माड्रिड, सोसिडाड र रियल मड्रिडको समान २६ अंक छ ।