हामी सबैकाे संसारन्यूज

पौष २, काठमाडौं । प्रधानमन्त्री केपी शर्मा ओलीले फेरि संवैधानिक परिषदको बैठक बोलाएका छन् । स्रोतले जनाएअनुसार ओलीले बिहिबार साँझ ५ः३० बजेको लागि बैठक बोलाएका हुन् ।

यसअघि बुधबार मात्रै ओलीले नेकपाको स्थायी समिति बैठकमा अध्यादेश फिर्ता लिने सहमती गरेका थिए । जुन सहमतीअनुसार नै पार्टीका अर्का अध्यक्ष पुष्पकमल दाहाल ‘प्रचण्ड’सहितका नेताहरुले संसदको विशेष अधिवेशन बोलाउने मागबाट पछि हटेका थिए ।

तर, बिहिबारसम्म पनि अध्यादेश फिर्ताको सूचना राष्ट्रपति कार्यालयबाट आएको छैन् । अध्यादेश फिर्ता नभईरहेको बेलामा उनले परिषदको बैठक बोलाएका हुन् ।

प्रधानमन्त्री ओलीले प्रमुख प्रतिपक्षी दलका नेता शेरबहादुर देउवालाई परिषदको बैठक बोलाएको जानकारी पठाएका छन् । देउवा निकट स्रोतका अनुसार देउवाले बैठकमा भने उपस्थिति नहुने जानकारी दिएका छन् ।

यसअघि मंगलबार बिहान बोलाएको बैठकमा देउवा र सभामुख अग्निप्रसाद सापकोटा उपस्थित थिएनन् । उक्त दिन नै अध्यादेश जारी गरिएको थियो । अध्यादेश जारीपश्चात ओलीले परिषदको बैठक मंगलबार साँझ राखेका थिए ।