Sansar News
पुष, काठमाडौँ । चिकित्सा शिक्षा तर्फको स्नातकोत्तर तह (पिजी) को एकीकृत प्रवेश परीक्षा यही पुस १८ गतेदेखि सुरु हुने भएको छ।
चिकित्सा शिक्षा आयोगले अत्यन्त जरुरी सूचनाका रुपमा आज परीक्षाको नयाँ मिति र तालिका सार्वजनिक गरेको हो।
एकीकृत प्रवेश परीक्षा सन्दर्भमा परेका रिट निवेदनहरु सर्वोच्च अदालतले बुधवार खारेज गरेपछि आयोगले परीक्षाको मिति र तालिका प्रकाशित गरेको हो । सार्वजनिक गरेको परीक्षा मिति अनुसार पुस १८, १९ र २० गते परीक्षा बिहान ११ बजेदेखि दिउँसो २ बजेसम्म हुनेछ।
आयोगले कोरोना सङ्क्रमितका लागि छुट्टै व्यवस्था गर्दै सङ्क्रमितले पिसिआर रिपोर्टसहित अग्रिम जानकारी गराउनु पर्ने आयोगले जनाएको छ।
यसअघि चिकित्सा शिक्षा आयोगले असोज २७, २८ र २९ गते परीक्षा मिति तोकेको थियो। तर सर्वोच्च अदालतको असोज २२ गतेको अन्तरिम आदेश पछि परीक्षा स्थगित भएको थियो।
वि.सं.२०७७ पुस २ बिहीवार १९:३५ मा प्रकाशित
