Sansar News
२ पुस, काठमाडौं । सुत्केरी र जेष्ठ नागरिकलाई निशुल्क सेवा दिने उद्देश्यले गाँउपालिकाले एम्बुलेन्स खरिद गरेको छ । सिन्धुपाल्चोकको पाँचपोखरी थाङ्पाल गाउँपालिकाले आफ्नो स्वामित्वमा रहने गरि दुईवटा एम्बुलेन्स खरिदगरि सेवा शुभारम्भ गरेको छ ।
नयाँ एम्बुलेन्सको पालिका अध्यक्ष टासी लामा र प्रमुख प्रशासकीय अधिकृत सुनिल निरौलाले विधिवत् पूजा गरी सेवा शुभारम्भ गरेका हुन् । यस अघि पालिका भित्र दुईवटा मात्र एम्बुलेन्स रहेको र उक्त एम्बुलेन्सबाट पालिका भित्रका सम्पूर्ण क्षेत्रमा सेवा प्रदान गर्न असहज बनेकाले पालिकाको पहलमा दुईवटा थप एम्बुलेन्स खरिद गरेको छ ।
अब थप गरिएका दुई एम्बुलेन्स सहित चार एम्बुलेन्सले पालिका भित्रका आठ वडामा सेवा प्रदान गर्दा बिगतमा रहदै आएको एम्बुलेन्स सेवाको अभाव कम हुने विश्वस गरिएको छ । खरिद गरिएका दुईवटा एम्बुलेन्स मध्य एउटा पालिका आफैले र अर्को पालिकामा रहेको हाँडीखोला साना जलविद्युत आयोजनाले पालिकाको लागि खरिद गरिदिएको हो ।
पालिकाको स्वामित्वमा रहने दुई एम्बुलेसले ७० देखि ८० वर्षका जेष्ठ नागरिकलाइ ५० प्रतिशत छुट दिने छभने सुत्केरी र ८० वर्ष माथिका जेष्ठ नागरिकका लागि निःशुल्क सेवा प्रदान गर्ने भएको छ । त्यसका साथै पालिकाले संचालनमा ल्याउन लागेको एम्बुलेन्सको भाडादरमा पनि सहुलियतताको व्यवस्था गरिएको पालिका अध्यक्ष लामाले बताए ।
वि.सं.२०७७ पुस २ बिहीवार १९:५५ मा प्रकाशित
