Sansar News
पुस ७, काठमाडौं । संसद विघटनको निर्णय खारेजीको माग गर्दै नेकपाका ४ सांसदले सर्वोच्च अदालत रिट दायर गरेका छन् । नेकपाका सांसदहरु देव गुरुङ, कृष्णभक्त पोखरेल, शशी श्रेष्ठ र रामकुमारी झाँक्रीले मंगलबार सर्वोच्च अदालत पुगेर रिट दायर गरेका हुन् ।
सांसदहरुले संसद विघटन असंवैधानिक रहेको जिकिरसहित रिट दायर गरेका छन् । रिटमा उनीहरुले संसद विघटनको निर्णयले आफुँहरुलाई जनताले ५ वर्षका लागि दिएको म्याडेटको समेत अपमान गरेको जिकिर गरेका छन् ।
प्रधानमन्त्री तथा राष्ट्रपतिको गैरसंवैधानिक कदमलाई उत्प्रेषणको आदेशबाट बदर गर्न रिटमा माग गरिएको छ ।
यसअघि नेकपाका अध्यक्ष पुष्पकमल दाहाल प्रचण्डसहित नेकपाका ९० सांसदको नामबाट रिट दिने तयारी गरिएको थियो । तर, सबैको व्यक्तिगत कागजपत्र नजुटेसँगै ४ सांसदको नामबाट रिट दायर गरिएको सांसद रामकुमारी झाँक्रीले जानकारी दिइन् ।
वि.सं.२०७७ पुस ७ मंगलवार १६:२७ मा प्रकाशित
