हामी सबैकाे संसारन्यूज

काठमाडौं। बेलायतका विभिन्न स्थान, विशेषगरी उत्तरी आयरल्याण्ड लगायतका क्षेत्रमा आप्रवासनसम्बन्धी विषयसँग जोडिएका तनाव तथा अशान्तिका घटनाहरू सार्वजनिक भइरहेका बेला एनआरएनए यूकेले त्यहाँ रहेका नेपाली समुदायलाई सतर्क रहन आग्रह गरेको छ।

एनआरएनए यूकेका अध्यक्ष राजेन्द्र पुडासैनीले जारी गरेको प्रेस वक्तव्यमा बेलायतमा बसोबास, रोजगारी तथा व्यवसाय गरिरहेका सम्पूर्ण नेपाली दाजुभाइ तथा दिदीबहिनीहरूलाई परिस्थितिप्रति सजग रहन अनुरोध गरिएको छ।

वक्तव्यमा कुनै पनि अफवाहमा विश्वास नगर्न र स्थानीय काउन्सिल, सुरक्षा निकाय तथा आधिकारिक स्रोतबाट प्राप्त जानकारीलाई मात्र आधार बनाउन आग्रह गरिएको छ। आवश्यक परेमा प्रहरी तथा सम्बन्धित स्थानीय निकायसँग सम्पर्क गरी सहयोग लिन पनि नेपाली समुदायलाई सुझाव दिइएको छ।

त्यसैगरी, आफ्नो परिवार, समुदाय तथा विशेषगरी विद्यार्थी र नवआगन्तुक नेपालीहरूलाई पनि वर्तमान परिस्थितिबारे सचेत र जानकारी राख्न आग्रह गरिएको छ।

अध्यक्ष पुडासैनीले शान्ति, आपसी सद्भाव, कानुनको सम्मान र सामाजिक जिम्मेवारीलाई प्राथमिकतामा राख्दै कुनै पनि उत्तेजनात्मक गतिविधिबाट टाढा रहन सबैलाई अनुरोध गरेका छन्। नेपाली समुदायले सधैंझैँ एकता, संयम र पारस्परिक सहयोगको भावना कायम राख्ने विश्वास व्यक्त गर्दै उनले आफू, परिवार र समुदायको सुरक्षाका लागि आवश्यक सावधानी अपनाउन पुनः आग्रह गरेका छन्।

एनआरएनए यूकेको उक्त अपिल बेलायतमा विकसित पछिल्लो परिस्थितिका बीच नेपाली समुदायको सुरक्षा र सचेतनालाई ध्यानमा राखेर जारी गरिएको जनाइएको छ।