हामी सबैकाे संसारन्यूज

काठमाडौं ।  गैरआवासीय नेपाली संघ (एनआरएनए) क्यानडाले गतवर्ष टोरोन्टोमा सार्वजनिक भएको कथित जबरजस्ती करणीसम्बन्धी घटनाबारे आफ्नो आधिकारिक धारणा सार्वजनिक गर्दै घटनामा संस्थाको भूमिका, मानवीय सहयोग तथा पछिल्लो कानुनी घटनाक्रमबारे स्पष्टिकरण दिएको छ।

संघका अध्यक्ष जगन सापकोटाद्वारा जारी प्रेस विज्ञप्तिमा घटना सार्वजनिक भएलगत्तै तत्कालीन अध्यक्ष माधव दुलालको नेतृत्वमा रहेको कार्यसमितिले विषयलाई गम्भीरतापूर्वक लिएको उल्लेख गरिएको छ। विज्ञप्तिअनुसार, पीडित भनिएकी नेपाली विद्यार्थीलाई आवश्यक सहयोग तथा कानुनी प्रक्रियामा सहजीकरण गर्न तत्कालीन महासचिवलाई जिम्मेवारी दिइएको थियो।

एनआरएनए क्यानडाले उक्त समयमा नेपाली समुदायबाट पीडित भनिएकी युवतीको कानुनी तथा प्रशासनिक प्रक्रियाका लागि आर्थिक सहयोगसमेत संकलन गरिएको जनाएको छ। संस्थाले आफूले कानुनी निकायको भूमिका निर्वाह नगर्ने, बरु मानवीय संवेदनाका आधारमा सहयोग गर्ने संस्था भएको स्पष्ट पारेको छ।

विज्ञप्तिमा हालै अदालतको प्रक्रियापछि आरोपित नेपाली युवक निर्दोष सावित भई रिहा भएको जानकारी सामाजिक सञ्जालमार्फत प्राप्त भएको उल्लेख गर्दै यस घटनाले मुद्दाको प्रकृतिमा नयाँ आयाम थपेको बताइएको छ।

संघले पीडित भनिएकी युवतीको वर्तमान अवस्था तथा उनी नेपाल फर्किएको वा नफर्किएको विषयमा कुनै जानकारी नभएको जनाएको छ। साथै, युवती नेपाल पुगेको भए पनि त्यस प्रक्रियामा संस्था संलग्न नरहेको स्पष्ट पार्दै घटनापछिका अन्य गतिविधिसँग एनआरएनए क्यानडालाई नजोड्न आग्रह गरेको छ।

एनआरएनए क्यानडाले निर्दोष सावित भएका नेपाली युवकले आवश्यक ठानेर सहयोगको माग गरेमा मानवीय सहायता उपलब्ध गराउन आफूहरू पूर्ण रूपमा प्रतिबद्ध रहेको जनाएको छ।

विज्ञप्तिमा संस्थाले क्यानडाको न्याय प्रणालीप्रति सम्मान व्यक्त गर्दै आगामी दिनमा पनि सत्य, न्याय र निष्पक्षताको पक्षमा उभिने प्रतिबद्धता दोहोर्‍याएको छ। साथै, विगतमा सहयोग गर्ने क्रममा कुनै त्रुटि भएको भए त्यसबाट सिकेर भविष्यमा सुधार गर्ने प्रतिबद्धता पनि व्यक्त गरेको छ।

संघले नेपाली समुदायमा शान्ति, सद्भाव र न्यायपूर्ण वातावरण निर्माण गर्ने उद्देश्यसहित सबै पक्षलाई संयमता अपनाउन तथा कानुनी प्रक्रियाको सम्मान गर्न आग्रह गरेको छ।