हामी सबैकाे संसारन्यूज

पुस ९, काठमाडौं । पुष्पकमल दाहाल ‘प्रचण्ड’ र माधवकुमार नेपालले नेतृत्व गरेको नेकपाको केन्द्रीय समिति बैठक महासचिव नै नछानी सकिएको छ । मंगलबारदेखि सुरु भएको बैठक महासचिव चयन गर्ने एजेण्डामै प्रवेश नगरी सकिएको हो ।

पार्टी प्रवक्ता नारायणकाजी श्रेष्ठले जानकारी दिएअनुसार पार्टी महासचिव चयनको जिम्मा स्थायी समितिलाई दिइएको छ । आगामी स्थायी समिति बैठकले महासचिव बारे निर्णय लिने उनले बताए ।

पार्टी महासचिव चयन किन हुन सकेन भन्ने पत्रकारको प्रश्नमा उनले भने, ‘पार्टी महासचिव चयन गर्ने अधिकार स्थायी समितिलाई दिइएको छ, आगामी स्थायी समिति बैठकले महासचिवबारे टुंगो लगाउने ।’

उनका अनुसार चर्चामा आए जस्तो महासचिव पदको विषयमा पार्टीभित्र विवाद छैन् । कसैले महासचिव बन्छु भनि विवादसहितको दाबी नराखेको पनि उनको भनाई छ ।

‘महासचिवको विषयमा हाम्रो पार्टीमा कुनै विवादसहितको दाबी छैन्, तीन जनाको दाबी भएको कुरा सत्य होइन्, बाहिर आएको प्रचारहरु गलत हुन्’, उनले भने ।

प्रचण्ड–नेपाल समुहभित्र महासचिवको लागि सुरेन्द्र पाण्डे र जनार्दन शर्माको नाम चर्चामा रहेकै बेला पूर्वमाओवादी र पूर्वएमाले पक्षबाट थप अन्य सदस्यले पनि दाबी गरेको चर्चा आएको थियो । पूर्वएमालेबाट सुरेन्द्र पाण्डेसहित भीम रावल र घनश्याम भुषाल अनि पूर्वमाओवादी पक्षबाट जनार्दन शर्मासहित कृष्णबहादुर महरा र वर्षमान पुनको नाम थपिएको चर्चा छ ।