हामी सबैकाे संसारन्यूज

पुस १३, काठमाडौं । संखुवासभाको चैनपुर–४ स्थित मैदानेमा आइतबार भएको भनिएको दोहोरो भिडन्त नक्कली भएको नेत्रविक्रम चन्द नेतृत्वको (नेकपा)ले दाबी गरेको छ । घटनाबारे एक प्रेस विज्ञप्ती जारी गर्दै नेकपाले घटना सर्वसाधारणमाथि गरिएको ज्यादती लुकाउन बनाइएको नक्कली भिडन्त भएको बताएको छ ।

पार्टी प्रवक्ता प्रकाण्डका अनुसार प्रहरीले जिल्ला सेक्रेटरी युवराज राईकी बहिनी चन्द्रकला राईमाथि भिडन्तको नाममा अचेत हुनेगरि कुटपीट गरेको छ । उनका अनुसार प्रहरीले राईको ढाड नै भाँचेका छन् ।

‘संखुवासभा जिल्लाको चैनपुर नपा. ४ मैदानेमा हाम्रो पार्टीका जिल्ला सेक्रेटरी युवराज राईको घरमा गई प्रहरी टोलीले सर्वसाधारण घरपरिवारमाथि कुटपिट गरेको घटनाप्रति हाम्रो पार्टीको गम्भीर ध्यानाकर्षण भएको छ’, विज्ञप्तीमा प्रकाण्डले भनेका छन्, ‘प्रहरीले जिल्ला सेक्रेटरी युवराज राईकी बहिनी भएकै कारणले चन्द्रकला राईलाई कुटपिट गरी ढाड भाँचेर अचेत अवस्थामा पुर्याएको छ, यसरी नक्कली भिडन्तको आवरणमा सर्वसाधारणमाथि दमन चलाउने कार्य असाध्यै निन्दनीय छ ।’

संखुवासभाका प्रमुख जिल्ला अधिकारी जीवनप्रसाद आचार्यले भने घटना दोहोरो भिडन्त भएको दाबी गरेका छन् । संसार न्यूजसँगको कुराकानीमा उनले उक्त क्षेत्रमा नेकपाका जिल्ला इन्चार्ज भएको विशेष सुराकीका आधारमा गएको प्रहरी टोलीमाथि विप्लवका कार्यकर्ताले फायरिङ्ग गरेको बताए । उनले नेकपाका कार्यकर्ताले फायरिङ्ग खोलेपछि प्रहरीले फायरिङ्ग खोलेको दाबी गरेका छन् ।